شەفەق نیوز- تاران

سوپای پاسداران ئیرانی، ئمڕوو شەممە، وازکردن گەروو هورمز بەسا وە رازیبۊن ویلایەتە یەکگرتگەیل وە مەرجەیل ئیران و دەسکیشانی لە دەسوەردان لە رێڕەو گفتوگۆیل هەرێمی.

 ئاژانس "تەسنیم" ئیرانی، لە قسەکەر وەناو سوپای پاسداران ئیرانی عەمید سەردار موحیبی وت: "ئەگەر ویلایەتە یەکگرتگەیل رازی بوود وە مەرجەیل ئیرانی ئەوە گەروو هورمز بیگومان واز کریەێد".

 موحیبی هەمیش وت، کە "وازکردن گەروو هورمز کەفێدە ژیر میکانیزمەیل و مەرجەیلیگ تایبەت وە تاران، و هیچ پەیوەندییگ وە گفتوگۆیل ناوەین ئیران و سوڵتاننشین عومان نییە".

 دیاری کرد کە "گەروو هورمز ئەرا ئیمە تەنیا رێڕەویگ ئاوی ئابووری نییە، بەڵکم یەکیگە لە توخمەیل هیز جوگرافی و ستراتیژی".

یەیش لە وەختیگ تیەێد کە وەرپرسیگ ئەمریکی، راگەیان لە وەدەسهاوردن وەرەونواچگن لە گفتوگۆیل ناوەین ئیران و عومان، لەناو تەقەلایەیلیگ لە واشنتۆن ئەرا کووتاییهاوردن وە نواگیریکردن سەربازی وەگەرد تاران و گلەوداین جۊلەی دەریایی ئەرا گەرووەگە.

 ئاژانس "رۆیتەرز" لە وەرپرسە ئەمریکیەگە وت کە ویلایەتە یەکگرتگەیل دەسوەجێ دۊای راگەیانن لەباوەت رێککەفتنیگ ئەو گەمارۆ کە چەسپیاگەسە بان بەندەرەیل ئیرانی هەڵگرێد و جۊلەی بارهەڵگری بازرگانی وە بی ریگری دەسوەپی کەێدەو، و دیاری کرد کە رێکارە ئەمریکیەیل بەسیاگ مینن وە ئاست پابەندبۊن ئیران وە بڕگەیل رێککەفتنەگە.

لە وەختیگ سێ سەرچەوە ئەرا تووڕ "سی ئێن ئێن" ئاشکرا کردن کە سەرۆک دەسەی ئەرکان هاوبەش ئەمریکی، جەنەڕاڵ دان کین، لە قسەیل تایبەتیگ خەوەر داسە شمارەیگ لە گەورە راوێژکارەیل ترمب کە بایەسە ویلایەتە یەکگرتگەیل دەرچگنیگ لە جەنگەگە پەیا بکەێد، و هوشداری دا لەوەگ بڕیگ لە وژاردە سەربازییەیل ئەرا بەرزکردن جەنگ هاتێ بوونە مدوو ئەنجامەیل پێچەوانە، و پەلامار ئاسمانی وە تەنیا وەگەردایەتی ئەگەری فرە بەس نییە ئەرا وەدەسهاوردن ئامانجە راگەیانریایەیل ئەمریکی.