شەفەق نیوز - تەهران

سوپای پاسداران ئیرانی، ئیوارەی ئمڕوو چوارشەممە، دووپات کرد لەبان کۆنترۆڵ هێزەیلی لەبان گەروو هورمز، و دیاریکرد ریەیل رەدبوین "نایاسایی" لەی نزیکە بەسریەن.

ئاژانس "فارس" لە زوان وەرپرسیگ لە سوپای پاسداران ئیرانی بڵاو کرد  وت: "گەروو هورمز بەسیاگە و هێزەیلمان وە تەواوی کۆنترۆڵی کەن"، و وتیش؛ "ریەیل رەدبوین (نایاسایی) لە گەروو هورمز دویای تەقانن ریڕەوەیل سەنگی لە گەرووەگە دروس کریەن".

وەرپرسەگە دیاری کرد  "ریەیل رەدبوین (نایاسایی) لە گەروو هورمز لەوەختیگ نزیک بەسریەێد".

لە لای ترەک، ئاژانس "تسنیم"، ئمڕوو چوارشەممە، خەوەر دا لە رەدبوین نەفت خام لە گەروو هورمز لەماوەی دوو رووژ گوزەشتە  داوەزیان دیاریگ وەخوەیەو دیە، کە رەسیە نزیکەی 3.8 ملیۆن بەرمیل لە رووژیگ؛ ک ئی شمارە جیاوازییگ ئاشکرا دێرێد وەگەرد تێکڕای هەفتانەی کلکردن نەفت لە ئی ری ستراتیژییە.