شەفەق نیوز- ریاز
قسەکەر فەرمی وەناو هێزە هاوبەشەیل "هاوپەیمانی پشتگیری شەرعییەت" لیوا روکن تورکی مالکی، ئمڕوو پەنجشەممە، نواگیریکردن مووشەکەیل حوسی راگەیان کە باشوور سعودیە کردنەسە ئامانج.
لە لێدوانیگ کە میدیایل سعودی بڵاوی کردن، وت، وەرەوڕووبوین و تەقانن چوار مووشەک بالیستی ئەنجام دریا کە گرووپ حوسییەیل وەرەو ناوچەی باشوور وەشانیان.
ئەوەیش دۊیای چەن ساعەتیگ لە راگەیانن هاوپەیمانییەگە تیەێد، ئیوارەی دۊیەکە چوارشەممە، وەرەوڕووبوین و تەقانن دوو فڕۆکەی بیفڕۆکەوان و دوو مووشەک کروز کە هەردوگ ناوچەی ریاز و باشوور کردنەسە ئامانج، وەرد وەرەوڕووبوین سێ مووشەک بالیستی وەرەو ناوچەی خوەرهەڵات.
ئیوارەی دویەکە چوارشەممە، ویلایەتە یەکگرتگەیل ئەمریکا، هوشداری ئەرا هاوڵاتییەیلی لە سعودیە و بەحرەین لە فرەبوین رخداری پەلامارەیل پەیوەنیدار وە ئیران نووەو کرد.