شەفەق نیوز- خوەرەڵات ناوڕاس
وەرپرسیگ ئیسرائیلی، ئمڕوو چوارشەممە، دووپات کرد کە تەل ئەبیب خەوەر داگەسە قونسوڵخانەی بەریتانی لە قودس خوەرەڵاتی وە بەساننی، و ئەوە کە ئەو دیپلۆماتکارەیلە کە لەناوی دامەزریاینە باوەڕپیکریانیان ماوەی 30 رووژ لەدەس دەن.
وەرپرسەگە وەپای ئاژانس "رۆیتەرز" وت، کە نۊنەرەیل بەریتانی دامەزریاگ لە شاند هەماهەنگی لەباوەت غەززە کە ویلایەتە یەکگرتگەیل لە ئیسرائیل سەرکردایەتیی کەێد، و هەمیش دیپلۆماتکارەیل بەریتانی نیشتەجی لە رامەلڵا، بایەسە ماوەی هەفت رووژ ەەجی بیلن.
و وەزیر دەیشت ئیسرائیلی جدعۆن ساعر، دۊکە سێشەممە، راگەیان کە قونسوڵخانەی بەریتانی لە قودس خوەرەڵاتی بەسێد کە باوەڕپیکریاگە لەلای دەسەڵات فەلەستینی لە کەنار خوەرئاوایی، ئەوەیش دۊای راگەیانن لەندەن وە چەسپانن سزایەیل لەبان ئەو کاڵایەلە کە لە نیشتەجیەیل ئیسرائیلی لە کەنارەگەو تیەن.
و فەرەنسا و کەنەدا هەمیش وتن، لە شان بەریتانیا، کە ئەوان هاوردەکردن کاڵایەیل لە نیشتەجیەیل قەیەغە کەن.
سێ سەرچەوە وتن کە حکومەت ئیسرائیلی، کە مەزەنەی سزایەیلە کریاد، بڕیارە ئمڕوو چوارشەممە کردەو بوود ئەرا باسکردن لە وەڵامەگەی لەبان ئەو دەوڵەتەیلە کە هەمیش پشتگیری لە رێکارە بەریتانییەگە کردنە.
لەلای خوەیەو، وەزیر دەیشت بەریتانی ئد میلیباند حکومەت ئیسرائیلی تاوانبار کرد وە "چەوپووشیکردن" لە "پاکتاو رەگەزی" کە نیشتەجیبۊەیل لە کەنار خوەرئاوایی جیوەجیی کەن، و راگەیان وە قەیەغەکردن هاوردەکردن بەرهەمەیل نیشتەجیگە دروسکریاگەیل لە زەوییە داگیرکریاگەیل.
سەرۆک حکومەت بەریتانی ئاندی بێرنهام، دۊکە سێشەممە، لەڕی ماڵپەڕ "ئێکس" خەوەردا لە گامەیل خوەنریای و دیاریکریاگ ئامانجەیل دژ وە سیاسەتەیل قەبووڵنەکریاگ کە حکومەت ئیسرائیلی ئیرەنگە گرێدەی وەر، لەناویانیش قەیەغەکردن هاوردەکردن بەرهەمەیل نیشتەجیگە نایاساییەیل لە فەلەستین، و چەسپانن سزایەیل لەبان ئەو کەس و کۆمپانیایەلە کە پشتگیرییان کەن یا کاریان ئاسان کەن یا قازانج لەلیان وەدەس تیەرن، و ئەوانە کە بەشداری لە کارەیل دروسکردن نیشتەجیگەیل کەن.