شەفەق نیوز- واشنتۆن

هيزەیل فەرماندەیی ناوەندی ئەمریکی "سێنتکۆم"، رووژ شەممە، راگەیان کە سێ کەشتی هەڵگر نەفت خاو ئیرانی کرديەسە ئامانج، دۊای ئەوەگ سوپای پاسداران ئیرانی موشەکەیل بالیستی وەرەو دوو کەشتی سەروە ویلایەتە یەکگرتگەیل وەشان.

"سێنتکۆم"، لە بەیاننامەیگ کە ئاژانس شەفەق نیوز چەوی وەپی کەفت، خەوەردا کە "هەڵگر فڕۆکەیل ئەمریکی و ویرانکەریگ موشەکی تۊنستن لە فرەیگ لە پەلامارەیل ئیرانی خوەیان بپارێزن"، دووپات کرد کە هیچ یەکیگ لە فەرمانبەرەیل ئەمریکی زەخمدار نەۊنە.

هەمیش وت: "دۊای پەلامارەیل شکستخواردگ ئیران، فەرماندەیی ناوەندی وە شیوەیگ هەمیشەیی هەردوگ کەشتی هەڵگر نەفت خاو سەروە سوپای پاسداران ئیرانی M/T Downy لەوەرانوەر کەناراو دورگەی خەرج و M/T Stark 1 لە نزیک جاسک پەک خست".

دیاری کرد کە "هیزەیل ئەمریکی وە تەواوی کەشتی هەڵگر نەفت خاو بی بار M/T Kylo (کە وە ناو Noxen یش ناسریاگە) لە کەنداو عومان ویران کردن، و کەشتییەگە لە چەن شوینیگ ناسک لەلی دانە تا لەکار بکەفێد، دۊای ئەوەگ رێنمایی دەسەگەی کریا تا دەس لەلی بکیشن".

بەیاننامەگە وتیش کە "سێ کەشتییە هەڵگر نەفت خاوە ئیرانییەگە بەشیگن لە توڕیگ سای وە بلیۆنەها دۆلار کە پۊلدارکردن سوپای پاسداران ئیرانی و بریکارەیل هەرێمیی کەن، و ئیران هیچ مدوویگ ئەرا وەرگریکردن لەلیان نەیرێد".

لەلای خوەیەو، فەرماندەی فەرماندەیی ناوەندی ئەمریکی، ئەدمیراڵ براد کوپەر وت: "با پەیامەگە ئەرا سوپای پاسداران ئیرانی ئاشکراەبوود: ئەگەر ئاگر وەشاننە بان دوو کەشتی لە کەشتییەلمان، ئەوە خەرجیگ ئابووری بەرزتر چەسپنیمن و سێ لە کەشتییەیلتان لەکار خەیمن".

کوپەر هەمیش وت: "دوودڵ نیەویمن لە وەرگریکردن لە هیزەیل ئەمریکی، و ئەگەر هەوەجە بکەێد، ویرانکردن کەشتیگەل نەفت ئیرانی دیاریکریاگ و ئاشکرا".

ئاژانس "فارس" ئیرانی وەرجە وەختیگ لە ئمڕوو شەممە خەوەردا لە ژنەفتن دەنگ تەقینەوەیەیل لە نزیک دورگەی خەرج ئیرانی.

ئاژانسەگە خەوەردا کە کەشتییگ هەڵگر نەفت ئیرانی لە دورگەی خەرج تویش پەلاماریگ موشەکی ئەمریکی بۊە.

وەزیر گەنجینەی ئەمریکی سکۆت بێسنت، دۊکە جمعە، دووپات کرد، کە "دەمار ژیان ئەرا هەناردەیل ئیران بڕیەێد، و نیەتۊەنێد یەدەگ نەفت خوەی نووەو بکەێد وەگەرد کەڵەکەبۊنی لەبان ئەو کەشتییەیلە کە لە گەروو هورمز گیر خواردنە".