شەفەق نیوز/ پەیمانگای جیۆفیزیکی ئەمریکی، ئمڕوو جمعە، راگەیان کە زەویلەرزەیگ وەتونی ٧.٤ پلە وە پەیمانەی ڕێختەر باکوور شیلی لەرزانیە، لە وەختیگ هووشداری لە شەپوول تسونامی دەرنەکردگە.
وەگورەی ئاژانس فرانس پرێس، ناوەند زەویلەرزەگە وە دویری 265 کیلۆمەتر لە خوەرهەڵات شار ئەنتۆفاگاستای کەنار دەریا بویە، وە قویلایی 126 کیلۆمەتر.
گابرێل بۆریچ، سەرۆک شیلی لەبان پلاتفۆرم “X” ( تویتەر جاران) نویسان: “تا ئیسە هویچ خەوەریگ لە کوشیان و زیانیگ گەورە نییە، بەڵام تیمەیل زانیاری گردەو کەن”.
شیلی کەفێدە بان "ئەڵقەی ئاگر" زەریای هێمنر کە کەوانەیگ چالاکییە زەویلەرزەی فرەس و لە ژاپۆنەو درەیژەو بوودە باشوور خوەرهەڵات ئاسیا و گوڵەم زەریای هێمن.
لە ساڵ ٢٠١٠ زەویلەرزەیگ وەتونی ٨.٨ پلە تسونامییگ دروس کرد کە تەواو ئاوایەیل باشوور و ناوڕاس وڵات گردەو و نزیکەی ٥٢٠ کەس کوشت.
شیلی لە خوەرئاواو هاوسنوورە وەرد زەریای هێمن و لە خوەرهەڵاتەو زنجیرە چیای ئەندێس، و یەکیگە لەو وڵاتەیلە کە لە روی زەویلەرزە چالاکترین وڵاتەیل جەهانە.