شەفەق نیوز/ خەڵک دیمەشق پایتەخت سوریا، ئاگادار بوین لە زەویلەرزەیگ وەتونی ٥.٢ پلە، و ماڵپەڕەیل سۆشیال میدیا باس کردن کە لە چەن شاریگ سوریا وەگەرد بەیروت پایتەخت لوبنان لە لەرزەگە ئاگادار بوینە.
سایت زەویلەرزەناسی ئۆڕۆناوڕاسی وت: زەویلەرزەیگ وەتونی ٥.٢ پلەی لەبان پەیمانەی ریختەر لە ساعەت ١٠:١٥ وە وەخت گرينيتش رویداوەگە.
ناوەند نیشتمانی زەویلەرزەناسی سوریا وت: خەڵک پارێزگایل دیمەشق و حومس و حەلەب و تەرتوس و لازقیە لە زەویلەرزەگە ئاگادار بوینە، کە وەدویری ٤ کیلۆمەتر وەرەو خوەرئاوای شار سلمیەی ناوڕاس وڵاتەگە بویە، و تونیەگەی رەسیە ٥.٢ پلە لەبان پەیمانەی ریختەر.
ناوچەگە بە چەن رووژیگە زەویلەرزە لەناوی گورجە، کە وەرجە چەن رووژیگ رەسیە شارەیلیگ لە سوریا و تورکیا، وەلێ هەکاتی زەویلەرزە ویرانکەرەگەی ساڵ ٢٠٢٣ نەوی.
وەرجە چەن رووژیگ، زەویلەرزەیگ وەتونی ٥.٥ پلە داد لە ناوڕاس سوریا و زیڕە و دەڵەکدان خستە ناو مەردم، کە ژن پیریگ گیانی لەدەسدا، و ٢٥ کەس زەخمدار بوین، و خەڵک ئوردن و لوبنان لە لەرزەگە ئاگادار بوین.