شەفەق نیوز - واشنتۆن
دادگایگ فیدراڵی لە برووکلین لە شار نیۆیۆرک، بڕیار دا وە زیندانیکردن هاووڵاتی پاکستانی ئاسف میرشانت (48 ساڵ) ئەرا ماوەی 330 مانگ، کە 27 ساڵ و نیم کەێد، دۊای تاوانبارکردنی وە پلانداین ئەرا جیوەجیکردن تیرۆرکردنەیل سیاسی لەناو وڵاتەیل یەکگرتگ وە رێنمایی لە سوپای پاسدارەیل ئیرانی.
دادوەر لە دادگای ناوچەیی ئەمریکی ئیریک ئار. کومیتی فەرمانەگە دەرکرد، دۊای ئەوەگ دەسەی سوێنخواردگەیل لە ئازار/ مارس 2026 میرشانت تاوانبار کردن وە هەردوگ تاوان "تەقەڵای ئەنجامداین کار تیرۆریستی رەدبۊ لە سنوورەیل" و "کوشتن لە وەرانوەر کرت".
لێکۆڵینەوەیل ئاشکرا کردن کە سوپای پاسدارەیل ئیرانی میرشانت خستیەسە خزمەت خوەی لە ساڵ 2022 لە ماوەی سەردانە ئایینییەیلی ئەرا ئیران، وەختیگ چەوی کەفتە وەرپرسەیلی نزیکەی 15 گلە لە تاران کە لە ماوەی مەشقەیل لە دژە سیخوڕی وەرگرد وەرجە رەوانەکردنی ئەرا وڵاتەیل یەکگرتگ لە نیسان/ ئەپریل 2024.
پلانەگە ئامانج تووڵەسەنین لە تیرۆرکردن فەرماندەی فەیلەق قودس ئیرانی قاسم سولەیمانی وە گورزیگ ئاسمانی ئەمریکی لە بەغداد لە کانوون دۊەم/ یەنایەر 2020 داشت.
میرشانت لە شایەتییەگەی چگە ژیر ئەوە سەرۆک ئەمریکی دۆناڵد ترەمپ ئامانج سەرەکی بۊە، وە دەسنشانکردن ئەرا ئەوە کە لایەن پەیوەندیدار ئیرانییەگە هەمیش ناو سەرۆک ئەو وەختە جۆ بایدن و باڵیۆز وەرین لەلای نەتەوە یەکگرتگەیل نیکی هەیلی هاوردگە جۊر ئامانجەیل چەوەڕیکریاگ لە ماوەی هەڵمەت هەڵوژاردنەیل 2024.
میرشانت لەوەرانوەر دادگاگە وت گوایە ناچار کریاس لەبان بەشداریکردن لە پلانەگە ئەرا پاراستن ئەندامەیل لە خیزانەگەی کە لە تاران نیشتەجیین لە زوور سوپای پاسدارەیل، و چەوەڕی دەسگیرکردنی لەلایەن دەسەڵاتە ئەمریکییەیلەو کردگە وەرجە رۊداین هەر پەلاماریگ.
لە وردەکارییەیل پووچەڵکردن پلانەگە، میرشانت دەسوەجێ دۊای رەسینی ئەرا وڵاتەیل یەکگرتگ لە نیسان/ ئەپریل 2024 پەیوەندی وە یەکیگ لە ناسیاگەیلی کردگە ئەرا دەسمیەتیداین لە رێکخستن پرۆسەگە و وردەکارییەیل ئامانجگردن سیاسییگ لە گردەوبۊنیگ هەڵوژاردن ئەرای شیکردیەسەو، وەلێ ئی کەسە دەسوەجێ نویسینگەی لێکۆڵینەوەیل فیدراڵی ئاگادار کردگە و بۊەسە هەواڵدەریگ نهێنی.
هەواڵدەرەگە میرشانت پەلکیش کردگە ئەرا رەفتارکردن وەرد بریکارەیل نهێنی ئەرا نویسینگەی لێکۆڵینەوەیل فیدراڵی کە خوەیان جۊر بکویەیل وەکراگیریاگ نیشان دانە، وەختیگ سلفەیگ کاش وە بڕ 5000 دۆلار وەپێیان داگە.
لە 12ی یۆلیۆ/ تەممووز 2024 لە ویلایەت تەکساس دەسگیر کریا لە ماوەی ئامادەکاریی ئەرا وەجیهیشتن وڵاتەگە، و داواکار گشتی ئەمریکی تۆد بلانش دۊای دەرچگن فەرمانەگە دووپات کردە بان ئەوە کە وڵاتەیل یەکگرتگ چەوپووشی نیەکەێد وەرد هەر پلانەیلیگ تیرۆریستی بیانی کە سەرکردەیلی ئامانج بگرێد، وە دووپاتکردن وەدۊاچگن گشت ئەو وەرپرسەیلە کە لەبانی هەن.
لە وەرانوەر ئەوە، تاران وە شیوەیگ فەرمی هەر پەیوەندییگ وەو پلانەیلە کە ئامانجیان تیرۆرکردن ترەمپ یا هەر وەرپرسەیلیگ ئەمریکی ترەک بوود رەتەو کرد.