شەفەق نیوز/ مەسعود پزیشکیان سەرۆک ئیران، پەیمان دا حکومەتەگەی نەیلێد پولیس ئەخلاق نوای ژنەیل بگرن لەباوەت پووشین حیجاب، کە جویر کاریگ ناچارگردنە وەبان دویەتەیل وڵاتەگە چەسپیاس.

تەمەیل سەرۆک کە لایەنگر رەوت چاکسازیخوازە، وەگەرد دویەم ساڵیاد مردن مەهسا ئەمینی تیەێد، کە لەناو بنکەیگ پولیس ئەخلاق گیانی لەدەسدا، دویای دەسگیرکردنی لە تەهران، وەسەنگ ئەوە کە حیجاب وەسەریەو نەویە.

لەپشت کوشیان مەهسا ئەمینی بویە ناڕەزایی فرەیگ لە جویراجویر ناوچەیل ئیران، کە سەدان کەس لەناوی کوشیا، و دەیان لە هیزەیل ئەمنی وەگەردیان بوی، وەگورەی قسەی دەسەڵاتەیل، و هەزاران کەسیش لە پەراویز ئەو جویرەیلە دەسگیر کریان، کە ئیران وە کار ئاژاوە دادەی قەڵەم کە لە لایەنەیلیگ بیگانە پشتگیری کریانە، وەگورەی ئاژانس فرانس پرێس.

پزیشکیان مەوقەی هەڵمەت هەڵوژاردنی، پەیمان دا پولیس ئەخلاق لەناو جادەیل دەرکەێد، 

سەرۆک ئیران وتیش: بانگەشەکار کشتییش راگەیان کە پولیس ئەخلاق دەسەڵات نەیرن نواگیری ژنەیل لەناو جادەیل بکەن، وەگورەی رووژنامەی تلیگراف بریتانی. 

لە سیپتەمبەر ٢٠٢٢، پزیشکیان هەنار ئەندام بوی لە ئەنجومەن شورا، رەخنە لە پولیس گرد لە پشت کردن مەهسا ئەمینی.

دویای ئەوە، یەکیگ لەو خانمەیلە کە ناودیارە وە رەخنەگردن لە پولیس ئەخلاق بویە جیگر سەرۆک.

تەلەڤزیۆن ئیرانی فەرمی لەو وەختە وت: خانمە چاکسازیخواز زەهرە بەهروز ئازار لەتەمەن ٤٢ ساڵە، جویر جیگر سەرۆک کۆمار ئەرا کاروبار ژن وخیزان دانریا.

وەگورەی ئاژانس بلۆملیرگ ئەمریکی، ئی گامە لە وەختیگ تیەێد کە تویڕەیی جەماوەری وەرانوەر ئەو ریکارەیل سەختە بەرزەو بوود کە پولیس ئەخلاق ئەرا چەسپانن ریسگایل پڕتاڵ ئیسلامی لەبان ژنەیل لە شوینەیل گشتی جیوەجی کەێد.

رووژ دووشەممە، پزیشکیان هەمیش پەیمان دا ریکارە سەختەیل وەبان وەکارهاوردن ئەنتەرنێت سووکەو بکەێد، وەتایبەت لەبان سۆشیال میدیا.