شەفەق نیوز - پاریس/ بەرلین
وەردەوەردە لە ناوەین پولیس و ناڕەزایەتییکەرەیل لە ئەڵمانیا و فەرەنسا، شەو شەممە، بەرزەو بۊن، وەرد دەسکردن ناڕەزایەتیی گەنجەیل لە فڕانکفۆرت ئەرا کارەیل ئاژاوە کە بۊە هووکار زەخمداربۊن شمارەیگ لە پولیسەیل، لە وەختیگ پاریس رۊوەرۊبۊنەیل تونوتیژیگ وەخوەی دی کە لەناوی پۆلیس غاز ئەسرڕشن و کوتەک وەکار هاورد ئەرا بڵاوەپیکردن ناڕەزایەتییکەرەیل، لە ناوڕاس بەرزەوبۊن ئاڵووزییەیل لە چەن شاریگ فەرەنسی.
وەزیر ناوخۆی ویلایەت هێسن ئەڵمانی، رۆمان بۆزیک، وەپشتبەسین وە مەزەنەیل سەرەتایی، راگەیان کە سمارەیگ لە پولیسەیل لە ناو کارەیل ئاژاوە کە ناڕەزایەتییگ گەنجانە لە فڕانکفۆرت، پایتەخت دارایی ئەڵمانیا وەیخوەی دی زەخمدار بۊنە، وە دەسنشانکردن ئەرا ئەگەر زەخمداربۊن یەکیگیان وە زەخمەیل رخباریگ، لە چەوەڕی دڵنیابۊن لە رەوشەگەی.
بۆزیک، کە سەرەە پارت یەکێتی دیموکراتی مەسیحییە کە راوێژکار فریدریش مێرتس سەرکردایەتیی کەێد، دیاری کرد کە پولیس بڕیار بڵاوەپیکردن ناڕەزایەتییەگە دا کە دەسپێشخەری "جین زێد ریجێڵت" بانگەواز ئەڕای کردۊد، دۊای دووپاتەوبۊن فڕەداین تەقەمەنییەیل ئاگرین و کوتان وە سان.
وتیش کە ئەو هوشدارییەیلە لە ئەگەر تونوتیژی لە چەپ تونڕەو لە ناوەین ناڕەزایەتییکەرەیل راسبۊنیان چەسپیا، وە مەزەنەکردن شمارەی بەشداربۊیل لە کارەیل تونوتیژی کە پاڵنەرەیل چەپڕەوی تونڕەو دیرن وە نزیکەی 100 کەس، کە تاوانباریان کرد وە پەلامارداین پولیس وە وەکارهاوردن شۊشە و سان و کەرەستەیل ئاگرین.
وەزیر ناوخۆ دووپات کرد کە پولیس تۊنست کۆنترۆڵ کارەگە بکەێد، لە وەختیگ شمارەی بەشداربۊیل لە ناڕەزایەتییەگە رەسیە نزیکەی 8 هەزار کەس لە وەخت لۊتکەی، وەپەی مەزەنەی پۆلیس، لە وەرانوەر 9 هەزار وەپەی رێکخەرەیل.
فەرەنسا
لە فەرەنسا، رویوەڕویبوین لە ناوەین پولیس و ناڕەزایەتییکەرەیل لە پاریس سەر هەڵدا، وەرد رەسین ریپیوان ناڕەزایەتییەگە ئەرا شوین کۆتایی خوەی، لە ناوڕاس بەرزەوبۊن ئاڵووزییەیل لە شارەیل مارسیلیا و تۆلۆز، و وەکارهاوردن غاز ئەسرڕشن لە جادەیل پایتەختەگە.
پولیس خەوەر دا کە دەیان کەس دەمامکدار، کە پڕتاڵ سێە لەوەر کردۊن، چەکوش وەکار هاوردن ئەرا هەڵکەنین کوچگ شوورەیل و وەشانن لە هێزەیل ئەمن، لە وەختیگ لەلای کەم یەک شۊشەی ئاگرین (مۆلۆتۆف) وەرەو پولیس فڕە دریا.
هێزەیل ئەمن وەڵام دانەو وە تەقانن غاز ئەسرڕشن و جیوەجیکردن پرۆسەیل بڵاوەپیکردن وە وەکارهاوردن کوتەک، لە وەختیگ پولیس پاریس وت کە گرووپیگ کە چەنن سەد کەس لە ئاژاوەگیڕەیل لەخوەی گرێد پەلامار ئەندامەیلی دا وە فڕەداین چشت، لە ناویان شۊشەی ئاگرین "مۆلۆتۆف".
دیاری کرد کە ئەندامەیل پولیس جۊلە کردن ئەرا گلەوهاوردن سیستەم گشتی، لە وەختیگ دەسەڵاتەیل دەسنشان ئەرا ئەوە کردن کە بڵاوەپیکردن ناڕەزایەتییەگە وەبی سەختییگ وەڕیەو چگ، وەرد جیگیربۊن بارهەڵگریگ ئەرا وەشانن ئاو لە نزیک شوین بڕیاردریاگ ئەرا دواییهاتن ریپیوانەگە.