شەفەق نیوز/ ٣٠ کەس لەلای کەمەو، ئمڕوو سێشەممە، گیانیان لەدەسدان، لەناو ئەو لافاوەیل تونە ک دالە ویلایەت پەروان باکوور کابوڵ پایتەخت ئەفغانستان.

کەناڵ "تڵوع نیوز" ئەفغانی وت:  ٣٠ کەس لە پەروان گیانیان لەدەسدان و نزیکی ١٠٠ کەسیش زەخمدار بوین، لەناو ئەو لافاوەیلە، و وەرپرسەیلیگ باس بیسەروشوینی ١٠٠ کەستر کردن.

وتیش: ژن و زاڕوویش هاناو ئەو بیسەروشوینەیلە، و کەناڵەگە لە زوان پارێزگار پەروان وت: شمارەی کوشیاگەیل رەسیە ٣٠ کەس، وەگەرد ٩٥ زەخمدار،  و زیاتر لە ١٠٠ ماڵ خاپوور بویە.

یەکیگ لە کەسوکارەیل قوربانییگ وت: کەلەمەی گەورەیگ هاتە سەرمان، و ئاوای گەورەیگ ویران بوی، و شوین ئەو ئاوایە و ماڵەیلی نەما.

لافاوەیل دویەشەو نەگ تەنیا رەسیژە پەروان،  باوجی لە بڕیگ لە ناوچەیل ئەفغانستان زەرەد رەسانیە، جویر هەرێم کابیسا و هەرێم نانگارهار.