وەگورەی سایت "DW عەرەبیە"ی ئەڵمانی، شمارەی فرەیگ لە پیاوەیل پەنا وە کڕ تایبەت وە رزگارکردن لەدەس تونوتیژی ماڵی لە ماوەی ساڵ گوزەشتە توومار کریا.

وەزارەت پەیوەندیدار لە ویلایەتەیل بافاریا، و باکوور راین- ویستفالیا، و لادن - فۆرتمبیرگ، و میکلنبۆرگ - فۆربۆمرن، راگەیان: ٤٤٩٨ پەیوەندی وەبان کڕ رزگارکردن توومار کریاگە ، م نزیکەی تیمیگ لە ساڵ ٢٠٢١ فرەترە.

وەگورەی قسەی ئەو وەزارەتەیلە، سێ بەش ئەوانەگ داوای تەمەی کردنە وە شیوەیگ راستەخۆ وە تونوتیژی زەرەدمەن بوینە، و گرفتە گەورەگە تونوتیژی دەروینی بویە، ک هەمیشە پەیوەندی وە تونوتیژی لەش یا سێکسی دیرێد.

  پڕۆژەی کڕ رزگارکردن وەرجە سێ ساڵ لە ویلاتەیل بافاریا و باکوور راین- ویستفالیا دروس کریا.

ئۆلریکە شارف خانمە وەزیر کاروبار کۆمەڵایەتی لە ویلایەت بافاریا وت: لەو مەوقەو نزیکەی دە هەزار پەیوەندی وە تەلەفۆن یا وە ئیمێڵ یا چات کریاگە، وتیش: ئەوە وە ئاشکرا دیاری کەێد چەنیگ داوا زیایەو بویە، و ئەو کارە چەنیگ گرنگە.

 یوزیفینێه پاوڵ خانمە وەزیر تواناکردن دەرفەتەیل لە ویلایەت باکوور راین-ویستفالیا وت: وە دروسککڕ رزگارکردن بۆشاییی لە گشت شوینەیل ئەڵمانیا پڕەو کردیمن، و پەیامیگ کل کردیمن ک نەبایەت باسکردن تونوتیژی لەبان پیاوەیل قەیەغە بوود.