شه‌فه‌ق نيوز/ رووژنامه‌ى غارديان باوه‌تيگ شيه‌وكارى له نويسانن سايمون تيزدل بڵاو كرد له‌بان به‌رژه‌وه‌نديه‌يل روسيا وئيران له سوريا دوياى جه‌نگ حه‌له‌ب و شيويانى له ئاينده وه بوونه‌ى هه‌ڵوێست هه‌ر ده‌وڵه‌تيگ و په‌يوه‌ندييان له ناوچه‌گه‌و وه‌ل گه‌وراهيزه‌يل.
نويسه‌ره‌گه‌ى وتگه: روسياو ئيران و رژيم به‌شار ئه‌سه‌د دوياى هاوردنه‌وه‌ى حه‌له‌ب ئاهه‌نگسازى ئه‌كه‌ن وه سه‌ركه‌فتن مێژوويى و باوه‌ڕيان ئه‌وه‌سه له ريڕه‌و جه‌نگ له سوريا ئاڵشت ئه‌دێ، وه‌لێ گرووپه‌يل ئۆپۆزسيۆن چه‌كدار وه‌ناو ئه‌لموعته‌دله ك له‌لايه‌ن خوه‌رئاواو سعوديه‌و ده‌وڵه‌ته‌يل تر عه‌ره‌بى پشتگيرى ئه‌كريه‌ن باوه‌ڕيان ئه‌وه‌سه جه‌نگ ته‌مام نه‌ويه، چوينكه رژيم سورى هيمان كزه‌و وه‌يه‌كجارى پشت وه هيزه‌يل بيگانه به‌ساگه.
جى باسه، نويسه‌ره‌گه باوه‌ڕيشى ئه‌وه‌سه ك فلاديمير بۆتين سه‌رۆك رووسى مقه‌يه‌تى له بنگه‌يل و هيزه‌يل ده‌رياوانى و ئاسمانى خوه‌ى ئه‌كا له سورياو پيشبينيه‌يل باراك ئۆباما سه‌رۆك ئه‌مريكى ئه‌كه‌فێده دروو وه ئه‌وه‌گ روسيا ئه‌كه‌فێده ناو چاڵێگ جوور ئه‌فغانستان له ساڵه‌يل هه‌يشتاو له هه‌مان وه‌خت گومانيش له هاوپه‌يمانى ئيران و روسيايش ئه‌كا، چوينكه ئيران سه‌ركه‌فتن حه‌له‌ب وه سه‌ركه‌فتن له‌بان ئه‌مريكا زانێدو له‌بان سنى و سعوديه‌و باس تازه‌وه ئه‌دێ له‌بان هيلال شيعى ك له ئه‌فغانسانه‌و ده‌س وه‌پى ئه‌كا وه‌ره‌و عراق و يه‌مه‌ن تا ره‌سێده حه‌وز ده‌رياى چه‌رمگ ناوڕاس.