شەفەق نیوز- مۆسکۆ
جیگر وەزیر دەیشت رووسی، سێرگی ریابکۆڤ، ئمڕوو جمعە، ئامادەیی مۆسکۆ راگەیان ئەرا باسکردن لەبان هەر پێشنیارەیلیگ نوو ئەرا یەکلاییکردن جەنگ وەگەرد ئۆکرانیا.
ریابکۆڤ لە دیداریگ وەگەرد ماڵپەڕ "نیوز دۆت ئار. یو" وت کە ویلایەتە یەکگرتگەیل ئامادەیی نیشان دانە ئەرا "دانوسەنینیگ ئاوەدانکەر و لەیەکفامستنیگ ئەرا هەڵوێست رووسیا"، و وڵاتەگەییش ئامادەس ئەرا ژنەفتن هەر پێشنیارەیلیگ نوو لەباوەت چۊنیەتی رەسین وە یەکلاییکردنیگ ئەرا جەنگەگە وەگەرد ئۆکرانیا، وەلی هەر پێشنیارەیلیگ بایەسە لەبان زەۊی رەنگ بدەێدەو.
هەمیش وت: "لەی قۆناغە، ئەوەگ گرنگترە ئەوەسە کە واشنتۆن تا چ رادەیگ تۊنێد کاریگەری لەبان بڕیارەیل رژێم کیێڤ و پاڵپشتە ئەوروپییەیلی بکەێد، کە هێمان خەو وە شکاننیگ ستراتیژی ئەرا رووسیا دۊنن".
دانوسەنینەیل ناوەین رووسیا و ویلایەتە یەکگرتگەیل ئەرا کووتاییهاوردن وە جەنگ لە ئۆکرانیا وە رادەیگ گەورە وسانە، یەیش لەناو سەرقاڵبۊنیگ فراوانتر وە جەنگ ئیران.
کرملین دۊکە پەنجشەممە وت کە هیچ زانیارییگ نەیرێد لەباوەت سەردانیگ نوو چەوەڕیکریاگ ئەرا مۆسکۆ کە هەردوگ کلخریای سەرۆکایەتی ئەمریکی جارید کۆشنەر و ستیڤ ویتکۆف کە وەرجە یە سەرکردایەتی دانوسەنینەیل وەگەرد رووسیا کردنە ئەنجامی بیەن.
وەزیر دەیشت ئەمریکی مارکۆ رۆبیۆ مانگ گوزەشتە راگەیان کە واشنتۆن پابەندە وە دەسمیەتیداین لە کووتاییهاوردن وە جەنگەگە، و یەیش دۊای گردەوبوینیگ کە لە مانیلا وەگەرد وەزیر دەیشت رووسیا سێرگی لاڤرۆڤ بەسایەی.
وەلی رۆبیۆ هوشداری دا لەوەگ هیچ رێککەفتنیگ زویوەزوی لە ئاسووی نییە، و دەسنشان ئەرا ئەوە کرد کە ویلایەتە یەکگرتگەیل تەقەلا دەێد ئەرا "پەیاکردن چارەسەریگ ناوەنجی".
ریابکۆڤ دەسنشان ئەرا ئەوە کرد کە رووسیا ئامادەس ئەرا ژنەفتن هۊرە نووەیل رۆبیۆ و وەردەوامبۊن لە دانوسەنین وەگەرد واشنتن.
وەردەوام بۊ: "رووسیای فیدراڵی ئامادەس ئەرا ژنەفتن هەر پێشنیارەیل کە وەگەرد ئەو ئامانجەیلە بگونجێد کە سەرۆک رووسیا دیارییان کردگە و رەچاو واقع لەبان زەۊی بکەێد".
دۊای نزیکەی چوار ساڵ و نیم لە هەڵگیرسان جەنگەگە، رووسیا کۆنترۆڵ لەبان نزیکەی یەک لە پەنج زەۊیەیل ئۆکرانیای دانوەپیدانریاگ ناودەوڵەتی کەێد، و مۆسکۆ فرە دووارەی کەێدەو کە وازە لەوەرانوەر دانوسەنین وە مەرج ئەوەگ ئی دانوسەنینە رەچاو "راسگانی نوو لەبان زەۊی" بکەێد.
ریابکۆڤ لە دیدارەگە وت کە رووسیا رکدارە لەبان وەردەوامبۊن دانوسەنین وەگەرد ویلایەتە یەکگرتگەیل لەباوەت چەکەیل ئەتۆمی، و ماوەی پەیماننامەی نیو ستارت ئەتۆمی لە شوبات گوزەشتە کووتایی هات ئەوەگ واتە هیچ کوتوبەندەیلیگ پابەندکەر لەبان چەکخانە ستراتیژییەیل گەوراترین دوو هیز ئەتۆمی لە جەهان نەمانە ئەرا یەکەمین جار لە دۊای زیاتر لە نیم سەدە.
مۆسکۆ ئۊشێد کە وەردەوام بوود لە پابەندبۊن وە سنوورەیل پەیماننامەگە لەباوەت مووشەک و سەرە جەنگییەیل تا ئەو مەوقە کە واشنتۆن وە خود چشت پابەند بوود.
ریابکۆڤ وت: "هێمان وازیمن لەوەرانوەر پەیاکردن ریەیل سیاسی و دیپلۆماسی لە بانان ئەرا وەدیهاوردن ئارامی لەی ناوچە".