شەفەق نیوز/ دەسەی ئاسایش فیدڕاڵی رووسی، ئمڕوو چوارشەممە، دەسگیرکردن جیوەجیکەر ئەو پەلامارە راگەیان کە بویە هوکار کوشیان ئیگۆر کیریلۆف فەرماندەی هیزەیل وەرگری تیشکی و کیمیایی و بایۆلۆژی لە سوپای رووسیا، دویەکە سێشەممە.

ئاسایش فیدڕاڵی لە بەیاننامەیگ، ئمڕوو چوارشەممە، وت: لە ئەنجام ئۆپراسیۆنیگ گورج و مینەکردن وە بەشداری وەزارەت ناوخۆ و دەسەی لێکۆڵینەوەی رووسی، هاوڵاتییگ خەڵک کۆمار ئۆزباکستان دەسگیر کریا، لەداڵگبوی ساڵ ١٩٩٥، بومبیگ دانریاگ نزیک بینایگ نیشتەجییوین لە جادەی ریازانیسکی لە مۆسکۆ تەقانیە، کە بویە هوکار کوشیان فەریق کیریلۆف و یاوەری رائد ئیلیا بۆلیکاریۆف.

بەیاننامەگە وتیش: جیوەجیکەر پەلامارە تیرۆریەگە وەلایەن ئۆکرانیا وەکار هاوریاس، و لەبان فەرمان ئەوان رەسیە مۆسکۆ کە بومبیگ دروسکریای کەفتیەسە دەسی، و خستیەسەی بان ماتووڕسکڵیگ کارەبایی، کە لە نزیک ماڵ کیریلۆف هیشتەی جیەو.

ئەرا چەودیاریکردن ماڵ کیریلۆف، تاوانبارەگە ماشینیگ گردیەسە کرا، و کامیێای ڤیدیۆی فيديو Wi-Fi خستیەسە بانی، تا وینەگە ئەرا سەرپەرشتارەیل تاوانەگە لە شار دنیبەر ئۆکرانیا پەخش بکەێد، و دویای وەرگردن نشانەی ڤیدیۆ لەبان دوو ئەفسەر لە دەر ماڵەگە، لە دویرەو بومبەگە خستیەسە کار.

بەیاننامەگە وتیش: خزمەتگوزاری تایبەت ئوکراینی، پەیمان داسە ئەو هاوڵاتی ئۆزباکستانیە وە خەڵاتیگ ١٠٠ هەزار دۆلار ئەمریکی، و کلرکردنی ئەرا دەوڵەتەیل یەکێتی ئەوروپا.

لە چوارچیوەی سکاڵای تاوانی وەبانی وەگورەی ماکەیل تیرۆر و کوشتن و هەڵگردن و بەرهەمکردن تەقەمەنی لە یاسای رووسیا، تاوانبارەگە کەفێدە روی سزایگ کە رەسێدە زیندانیکردن هەمیشەیی.

ئاسایش فیدڕاڵی دووپات کرد کە ئەوەسە فەرمانبەرەیل دەزگایل تایبەت ئۆکرانیا کە دەسیان هاناو پەلامارە تیرۆریەگە پەیا کریەن و سزای خوەیان بەن.