شەفەق نیوز- تاران

فڕۆکەخانەی ئیمام خومەینی لە تاران پایتەخت ئیران،  ئمڕوو شەممە، خەوەر دا لە وەردەوامبۊن گەشتەیل ئاسمانی ئەرا تورکیا و مالیزیا و چین و پاکستان و ڤێتنام و ئەفغانستان، وەپەی خشتەیل وەرجە وەختی.

 وەڕێوەبەرایەتی فڕۆکەخانەگە، لە بەیاننامەیگ کە ئاژانس شەفەق نیوز وەدۊای چگ، دیاری کرد کە بیجگە لەو گەشتەیلە کە هەڵوەشیانە، کە گەشتەیل ئیمارات و عراق و عومان و جۆرجیا لەناویانیە، خەوەر لە هەڵوەشانن هیچ گەشتیگ نوو نەیریاس.

 وتیش کە وەڕێوەبەرایەتی فڕۆکەخانەگە "تەقەلای فرەیگ دەێد" ئەرا سەرلەنوو وازکردن گەشتە ئاسمانییە بەسیاگەیل لە زۊترین وەخت.

 ئی پەرەسەنینە لەژیر سای سزایەیلیگ تیەێد کە وەزارەت خەزانەی ئەمریکی لە هەشت ئەیلول/ سێپتەمبەر خەوەر لەلیان دا لەبان 36 لایەن چەسپیاگ وە کەرت فڕۆکەوانی ئیرانی، کە 27 کۆمپانیای فڕۆکەوانی لەناویانیە.

وەڕێوەبەرایەتی فڕۆکەخانەی ناودەوڵەتی نەجەف بڕیار دا، وە وسانن گشت گەشتە ئاسمانییەیل کە لە ئیرانەو تیەن و وەرەو ئەورا چن، دەسوەپیکرد لە سەعات دوو شەوەکی دۊکە جمعە 25 ئەیلول/ سێپتەمبەر 2026 و تا ئاگادارکردنیگ ترەک، وە پشت بەسین وە رێنماییەیل فەرمی لەلایەن لایەنەیل تایبەتمەنەو.

وەلی حکومەت عراقی، ئمڕوو شەممە، خەوەردا، کە گفتوگۆیگ راسەوخۆ وەرد ئیدارەی ئەمریکی وەڕیەو بەێد، ئەرا وەخشین بڕیگ لە فڕۆکەخانەیل عراقی لە قەیەغەکردن گەشتە ئیرانییەیل.