شەفەق نیوز/  دەسەڵاتەیل ئیران ،ئمڕوو پەنجشەممە، فەرمان وەسێدارەدان پیاویگ جیوەجی کردن، ک وە زەخمدارکردن ئەندامیگ لە هیزەیل باسیج تاوانبار کریا، وەگورەی میدیایل راگەیانن فەرمی، لە یەکەمین وەسێدارەدان ک پەیوەندی وەو ناڕەزایەتیەیلە دیرێد ک یە نزیکەی سێ مانگە لە کۆمار ئیسلامی وەردەوامە.

ئاژانس خەوەری "ئیرنا"ی فەرمی ئیرانی وت: موحسن شکاری ئەو ئاژاوەکارە ک لە ٢٥ سیبتەمبەر ری جادەی ستار خان لە تەهران بڕیە، و چەقوو دایە شان چەپ ئەندامیگ ئاسایش، شەوەکی ئمڕوو پەنجشەممە، لە تەهران پایتەخت دریا سێدارە.

وەگورەی لیست توومەتەیل دادگای شوڕش لە تەهران، سکاڵا وە «نیاز کوشتن، و رخبردن و بیبەشکردن مەردم لە ئازادی و ئاسایش، و هەمیش زەخمدارکردن ئەفسەریگ وە چەک چەرمگ مەوقەی جیوەجیکردن ئەرکی، و بڕین جادەی ستار خان».

شکاری لە سێەی ئوکتۆبەر دەسگیر کریا، و یەکەم دانیشتن دادکردنی لە ١٠ی نۆڤەمبەر بویە.

ئیران کەفتیەسە لەرزەی ناڕەزایەتیەیل تونیگ، ک لە ناوڕاس سیپتەمبەر دەسوەپی کریا، لە دویای کوشتن ژینا ئەمینی ،٢٢ ساڵان ، وەدەس پولیس ئەخلاق.

لە تەقەلای کۆنتڕۆڵکردن ناڕەزایەتیەیل، دەسەڵاتەیل ئیران وتن: یە کار ئاژاوەس لەلایەن ئەمریکا و بەریتانیا و ئیسرائیل گاڵی دریاگە.

لە ٢٩ی نۆڤەمبەر ، ریخریاگ ماف مرۆڤ لە ئیران وت: ٤٤٨ کەس لەلای کەمەو وەدەس هەزەیل ئاسایش لەناو ناڕەزایەتیەیل ئیران کوشیانە، و هەزاران کەس دەسگیر کریانە، لەناویان کەسایەتیەیل ناودیاریگ لە ئەکتەر و تووپانباز بویه.