شەفەق نیوز/ ئیران فڕۆکەیل بیفرۆکەوان و سیستەمەیل وەکار تیەرێد تا شیوەی دەموچەوەیل بناسنێد، و ئەپلیکەیشن ئەلیکترۆنی ئەرا جیوەجیکردن یاسای حیجاب ناچاری ژنەیل، وەگورەی راپۆرتیگ لەلایەن نەتەوە یەکگرتگەیل.

 ئەو راپۆرت نەتەوەییە وت: ئیران ئیرنگە پشت وە تەکنەلۆژیا بەسێد ئەرا چەودیاریکردن و سزادان ئەو ژنەیلە کە یاسای پڕتاڵ ناچاری شکنن.

ئەپلیکەیشن "ناظر" لەبان مۆبایل سیستەمیگ سەرەکیە ئەرا ئی هەڵمەتە، کە حکومەت پشتگیریی کەێد و ری وە هاوڵاتیەیل و پولیس  دەێد بەدی ئەو ژنەیلە بکەن کە یاساگە شکنن.

وەگورەی راپۆرتەگە، ئەپلیکەیشن "ناظر" ری دەێد شمارەی ماشینەگە و شوینەگە ز وەختەگە توومار بکەێد ئەگەر ژنیگ وەبی حیجاب دی، و دویای ئەوە ئەپلیکەیشنەگە ماشینەگە لەبان ئەنتەرنێت دیاری کەێد و ئاگادار پولیس کەێد.

 راپۆرتەگە وتیش: ئەو ئەپلیکەیشنە پەیامیگ کوتپڕ ئەرا خاوەن ئەو ماشینە کل کەێد، و هوشداری وەپی دەێد لە شکانن یاسای حیجاب ناچاری، و ئەگەر پابەند وەی یاسا نەوود ماشینەگەی زەفت کریەێد.

  ئەو ئەپلیکەیشنە لەڕی سایت پولیس ئیران (FARAJA) وەپی رەسیەێد، لە ئەیلوول 2024  فراوانی کریا تا ژنەیل لەناو ماشینەیل ئەمبولانس، و ماشینەیل تەکسی و گواستنەوەی گشتی بگرێدەو.

هەرچەن کارکردن لەبان ئی ئەپلیکەیشنە لە کانوون یەکەم 2024 دویای مشتومڕیگ ناوخوەیی وسیا، وەلێ هیمان پڕۆژەی یاسای ئیرانی ئەرا حیجاب و داوانپاکی بویەسە جی مشتومڕ لەو وڵاتە.

ئەگەر بڕیار دریا، یاساگە سزایگ چەسپنێد کە رەسێدە 10 ساڵ زیندانی و باجیگ رەسێدە 12,000 دۆلار.

 وەگورەی مادەی 286 لە یاسای سزادان ئیرانی، ئەگەر بوخت "الإفساد في الأرض" وە ژنیگ کریا، هاتێ بڕەسێدە وەسێدارەدان.

لەبان ئەوەیش، یاساگە دەسەڵاتیگ فراوانتر وە دەزگایەیل ئەمنی ئیرانی دەێد ئەرا وەکارهاوردن تەکنەلۆژیا و چەودیاریکردن لە جیوەجیکردنی، وەگورەی راپۆرتەگە.