شەفەق نیوز/ کۆمار ئیسلامی ئیران دەسکردیە وە هەڵمەتیگ کلەوکردن پەنارەیل ئەفغانی نیشتەجی  ناو وڵاتەگە، و تا ئیسە زیاتر  لە  یەک ملیۆن پەنابەر ئەفغانی  ئەرا وڵاتەگەیان کلەوکریانە.

نادر یارئەحمەدی، راوێژكار وەزیر ناوخوەی ئیران ئرا کاروبار بیانیەیل و پەنابەرەیل وە میدیایەل ئیرانی راگەیاندیە، وەپای داتاگان زیاتر لە شەش ملیۆن و 100 هەزار هاوڵاتی رویکردنەسە ئیران  و لەو شمارەیش زیاتر لە دوو ملیۆن پەنابەر مووڵەت فەرمی مەنین نەیرن.

دیاریکرد، ئێ شمارە فرەس لە پەنابەرەیل ئەفغانی کاریگەری وەبان ئابووری وڵاتەگە دروسکردیە وە کەمەوکردن دەرفەت کارکردن ئەرا هاوڵاتیەیل ئیرانی، بیجگە لە بەرزەوبوین رێژەی تاوان و زیایبوین مادەی هووشبەر.

یارئەحمەدی ئاشکرایکرد:" لەچوارچمگ رێکخسن پرس پەنابەر، تا ئیسە توەنریاس زیاتر لە یەک ملیۆن پەنابەر  ئەفغانی لە خاک ئیرانەو دەرکریانە و ئەرا وڵاتەگەیان کلەوکریانە".