شەفەق نیوز- تاران

نرخ دۆلار ئەمریکی رووژ یەکشەممە، وەردەوام بۊ لە بەرزەوبۊن لە بازاڕ ئازاد ئیرانی، و رەد بۊ لە 207 هەزار تمەن، لە وەردەوامبۊن رێڕەو داوەزین بەهای ریاڵ ئیرانی.

 وەپای داتایەیل ماڵپەڕ "تجارة نیوز" تایبەتمەن وە چەودیاریکردن نرخەیل خەرجکردن لە بازاڕ ئازاد، نرخ دۆلار رەسیە نزیکەی 207 هەزار تمەن، لە وەختیگ سەنین و فرووشتن ئمڕوو ئاست 207 هەزار و 300 تمەن تومار کرد، هەمیش نرخ یۆرۆ بەرزەو بۊ ئەرا نزیکەی 239 هەزار و 830 تمەن لە بازاڕ ئازاد.

 داتایەیل نرخەیل  ئمڕوو دووپات کەن لە وەردەوامبۊن فشارەیل لەبان دراو ئیرانی؛ کە داتایەیل بازاڕ نیشان دان کە دۆلار رەسیەسە نزیکەی 2.077 ملیۆن ریاڵ ئیرانی، وە زیایبۊنیگ لە ئاست دۊکە، وەگەرد تومارکردن مەودایگ ئەرا مامەڵەکردن سەعاتەیل دۊایی ناوەین نزیکەی 2.034 و 2.084 ملیۆن ریاڵ.

 لە تەقەلایگ ئەرا کەمەوکردن لە بەرزەوبۊن نرخ دۆلار، بانک ناوەندی ئیرانی هەفتەی گوزەشتە خەوەردا لە خستنەناو نزیکەی 500 ملیۆن دۆلار لە پۊل کاش بیگانە لەناو توڕ بانکی، وەلی ئەوە ریگری نەکرد لە گلەوخواردن دۆلار ئەرا بەرزەوبۊن و تومارکردن ئاستەیل پەیمانەیی نوویگ.

 ئی بەرزەوبۊن نرخ دۆلارە هاوەخت وەگەرد زیایبۊن فشارە ئابوورییە ئەمریکییەیل لەبان ئیران و تونەوکردن سزایەیل تیەێد، لە وەختیگ تاران خەوەردا کە سزایەیل و گەمارۆ دەریایی شوینەوار گەورەیگ داشتنە لەبان بازرگانی دەیشت و ئابووری ئیرانی.