شفەق نيوز/ فاتیمە مهاجرانی قسەکەر حکومەت ئیران، ئمڕوو دووشەممە، راگەیان کە تەقینەوەگەی بەندەر رەجائی لە مانگ گوزەشتە، وە مدوو کەسیگ بویە، و ئیسرائیل دەس لەناوی نەیرێد.

مهاجرانیواو قسەیلی ئەرا ئاژانس "ريا نوفوستی" دیاری کرد کە لێکۆڵینەوەیل فوسخی هویچ کاریگ خراوەکاری لە پشت رویداوەگەی بەندەر شەهید رەجائی نەچسپانن، وتیش؛ دەسەڵاتەیل پەنج کەس لە ئەنجام کەموکوڵی دەسگیر کردن کە بوینە مدوو ئی کارەساتە.

 لەباوەت پرسیارکردن فەرزانە سادق خانمە وەزیر ریوبان لە پەرلەمان ئیران، مهاجرانی وت: هاتێ ئی ریکارە وەشیوەیگ پەیوەندی وە رویداوەگە بیاشتاد، وەلێ لە مافەیل دەستووری ئەنجومەن شورای ئیسلامی تیەێد لە پرسیارکردن وەرپرسەیل لەبان کاریلیان.

 وتیش: بایەسە پرسیارکردن پیشەیی بوود دویر لە هەر وەکارهاوردنیگ سیاسی، دووپاتیش کرد کە حکومەت وەگشت ئاشکراییگ وەرد ئی پرسە رەفتار کەێد.

 لەبان ئەو توومەتەیلە کە وە ئیسرائیل کریەێد لە رویداوەیگ هاوشیوە، مهاجرانی دووپات کرد کە ئیران لە لێکۆڵینەوەیلی پرسە ئەمنیەیل وە دویر نیەزانێد، وەلێ تا ئیسە هویچ بەڵگەیگ وەدەسی نەکەفتیە کە دەسیگ دەرەکی لەناو ئی تەقینەوەی دویاییە بویە.

 وتیش: ئیران وەرجەیە کەفنە وەر کارەیلیگ تیرۆری ئابووری و زانستی، بویە هوکار تیرۆرکردن شمارەیگ لە پسپۆڕەیل ئەتۆمیی، وەلێ تەهران وە تونی وەرم ئی پرسەیلە رەفتار کەێد، و پشت وە توانایەیل وەرگری و ئەمنی هازدار خوەی بەسێد ئەرا نواگیریکردن هەر هەڕەشەیگ.