شەفەق نیوز- تەهران

ریخریاگ وزەی ئەتۆمی ئیرانی راگەیان، کە 117 سەرچەوەی تیشکدەر چالاک لەناو پاڵاوگەیل و کۆمەڵگەیل پترۆکیمیایی کەفتنەسە وەر پەلامارەیل ئەمریکی.

ریخریایەگە وت کە پرۆسەیل بەرنامەی ئەتۆمی ئاشتیخوازانە نیەوسێد، و دووپات کرد لە وەردەوامی چالاکییە ئەتۆمییەیل، بی ئەوەگ وردەکاری زیایتر پیشکەش بکەێد لەباوەت شوینەیل وەئامانجگردن سەرچەوە تیشکدەرەیل یا قەوارەی ئەو زیانەیلە کە لە ئەنجام پەلامارەیل کەفتنەسەو.

هەڵویست ئیرانی لە وەختیگ تیەێد کە پیتانن یۆرانیۆم و چارەنۊس ئەمبار پیتنریاگ یەکیگ لە دیارترین خاڵەیل ناکۆکییە لە دانوستانەیل وەرد وڵاتە یەکگرتگەیل.

ئاژانس ناودەوڵەتی وزەی ئەتۆمی لە وەختیگ گوزەشتە ئاماژە کردۊ وە کەفتن کۆمەڵگەیل پترۆکیمیایی لە پارێزگای خووزستان ئیرانی وە وەر پەلامارەیل لە 4 نیسان/ ئەپریل 2026، و دیاری کردۊ کە بڕیگ لە دامەزراوەیل سەرچەوەیل تیشکدەر بەسیاگ وەکار تیەرن، لە ناویان کۆبالت-60 و سیزیۆم-137، ئەرا پەیمانەکردن و چەودیاری پیشەسازی.

سەرچەوە تیشکدەرەیل لە شمارەیگ لە پیشەسازییەیل ئەرا پەیمانەکردن و چەودیاری پرۆسەیل وەکار تیەن، وەلی کەفتن ئەو دامەزراوەیلە کە هانە ناویان وە وەر پەلامارەیل شایەت رخ و نیگەرانی لەباوەت بیوەییان دروس بکەێد، وە تایبەت لە رەوش زەرەدمەنبۊن سیستەمەیل کۆنتڕۆڵکردن یا دزەکردن ماددە تیشکدەرەیل ئەرا ناو ژینگەی دەورگرد.