شەفەق نیوز ــ لازقیە

تیمەیل ئاگر کپەوکردن سوریا وە پاڵپشتی 16 فرۆکە، ئەرا هەفتەمین رووژ وەبان  یەک وەردەوامن لە کپەوکردن ئاگر دارسانەیل لە ئاوایەیل لازقیە.

سەرچەوەیل سووری لە لێدوانیگ کە ئاژانس خەوەری شەفەق نیوز دیەسێ راگەیان "تا ئیسە 16 فرۆکەی ئاگر کپەوکردن لە  تورکیا و ئوردن و لوبنانەوە بەشداری لە ئۆپەراسیۆنەیل کپەوکردن کردنە مەزەنەکرێد شمارەگە ئەرا 20 فرۆکە زیاد بکەێد، ئەرا قایمکردن تەقەلای ئاسمانی، هەمیش ماشینەیل تایبەت لەبان زەوی کارکەن و پاڵپشتی تیمەیل ئاگرکپەوکردن  ناوخوهیی و ناودەوڵەتی کەن".

دیاریکردیە "تەقەلایەیل لەری ژووریگ ئۆپراسینەیل هاوبەشەو هەماهەنگ کرێد کە پێکهاتیە لە  وەزارەتە پەیوەندیدارەیل و دەزگا ناودەوڵەتیەیل، وە ئامانج کۆنترۆڵکردن ئاگرەیل و پاراستن ناوچە گرنگەیل جویر   یەدەگ سروشتی فارناق کە گرنگییەکی وەرچەویگ ئەرا ژینگەیی دیرێد".

سەرچەوەیل دیاریکردنە "ئاڵنگارییەیل وەشێوەیگ وەرچەو مەننە، چوینکە زەوی ناڕێک، جویر لێوارە بەرز و دارستانە چڕەیل، ریگرن لە رەسین تیمەیل وە ناوەن ئارەگە وەتایبەت لە ناوچەیل شێخ حەسەن و قەستەڵ مەعف. هەمیش وای بەهێزیش بەشدارە لە بڵاوبوین خێرای ئاگرەیل، سەرەڕای تەقەلاداین ئەرا   دامەزرانن کڕ ئاگرکپەوکردن وە وەکارهاوردن ئامێر قورس ئەرا دابڕان بەشیگ لەو شوینەیلە".

رووشنیکرد ، هاتی وەجیماگەیل جەنگ جویر مین و تەقەمەنی نەتەقیاگ رخداری راستەوخوەی وەبان تیمەیل ئاگرکپەوکەر دروسکەێد دۆخەگە زیاتر ئالۆزکەن".