رووژنامەگە لە ڕاپۆرتيگ وەناونیشان “دەوڵەيل کەنداو عەرەبی نیەخوازن بوونە دوژمن ئیران”، وت: “وڵاتەیل عەرەبی تەقەلا دەن ئۆپەراسیۆنەیل واشنتۆن لەدژ گرووپە لایەنگرەیل ئیران لە خوەرهەڵاتی ناوڕاس سنووردار بکەن”.

رووژنامە رووسییەگە دەسنشان وە راپۆرتیگ رووژنامەی "پۆلیتیکۆ" ئەمریکی کردگە، کە راگەیانیە "چەن وڵاتیگ عەرەبی ریگری لە باڵگردن فڕۆکە ئەمریکییەیل لە بنکەیلیان کەن".

سەرچەوەیل رووژنامە ئەمریکییەگە وتنە: ئەو بازیکەرەیلە کە "تەقەلای کیشانن فتیلەی گرژییەیل وەرد ئیران دەن، زیاتر لە هەڵمەتەیل ئەمریکا و هاوبەشەیلی وەبان گرووپە شیعەیل لە عراق و سوریا تەنگەو کەن"، و هەمیش لەبان  بزووتنەوەی ئەنسارڵای حووسی لە یەمەن.

 ئەو وەرپرسە لە زار  رووژنامەگە وتیە کە ئەمریکییەیل لە رەسین وە بنکەیلیان و لە ئازادیی هاتن وچگن ئاسمانی کەفنە وەر  سەختی.

رووژنامەی پۆلیتیکۆ، دەوڵەت ئیمارات کەفتیەسە ناو دەوڵەتەیل "ناڕەزا".  تا ئیسە دیار نییە کامیانیش کەفێدە ناو لیستەگە، بەڵام وە ئەگەریگ فرە باس قەتەر و کوەیت کەن.

لەی باوەتە ڤلادیمێر فرۆلۆڤ، پسپۆڕ پەیوەندییە ناودەوڵەتییەیل ئەرا رووژنامەی “نەزاڤیسیمایا گەزێتا” وتیە: هیمان گیچەڵ ئۆپۆزسیۆن عەرەبی فرە تون نییە.  وتیش: نیگەرانییەیل هاوپەیمانەیل جی فامستنە: حوسییەیل گووش لە هویچ کەسیگ نیەگرن. عراقییەیلیش نیەخوازن گیچەڵ وەرگەرد "لایەنگرەیل" ئیران بوود کە لەورا باوەت فرەیگ ها دەسیانەو. بەڵام ئەگەر پەلامارەیل لەبان بنکە ئەمریکییەیل ئەنجام بیریەێد و بزووتنەوەی بازرگانی لە دەریای سوور وەردەوامە و وەرەو بەرزەبوین چوود، واشنتۆن هویچ بژاردەیگ ترەک نەیرێد، و نیەخوازێد لە عراق و سوریا خوەی کەمەو بکەێد.

فرۆلۆڤ باس ستوینیگ کرد کە لەلایەن کینێس مەکێنزی فەرماندەی وەرین فەرماندەیی ناوەندی ئەمریکا نویساسەی و لەی دویاییە لە رووژنامەی نیویۆرک تایمز بڵاو کریاس و لەناوی ئویشێد نەبایەس ئەمریکییەیل خوەرهەڵات ناوڕاس وەجی بیلن.

وتیش: بیگومان ئەو هووشدارییە ئەرا ئەمریکییەیل ناخوەشە، بەڵام سعودیە، قەتەر، یا ئیمارات هویچ شوینیگ نەیرن تا داوای مقیتەتیکردن لە لایەنگرەیل ئیران بکەن.