شەفەق نیوز/ رۆژنامەی Sunday Telegraph بریتانی ئاشکراکرد لە زیندانکردن هەزاران لە کۆچبەرە ئەفریقیەگان لە سعودیە، لە کامپەیلیگ وەشیوەی ''کامپەیل کۆەیلەگان'' لە لیبیا، ئەرا نواگردن ڤایڕۆس کۆڕۆنا.
رۆژنامەگە رووژ شەممە وینەیلیگ بڵاوکرد کۆچبەرەگان لە ناو کامپەگانەو ئەرا رۆژنامەگە رەوانەیان کردنە، دەیان لەپیاوەیلیگ بی ئاز دەرخەن، وتنیش بەشیگیان لەوەر گەرمی تووش شەلل هاتن.
رۆژنامەگە وتیش؛ ئەو گیرهاتگەیلە وەبی شەوی وەقەڕەباڵغی ئەڵاژیانەسە ناو ژوور تەنگیگ وەپەنجەرەیل بویچگیگ.
یەکیگ لە وینەگان تەرم پووشیاگیگ دەرخست، گیرهاتگەیل وتن تەرم کۆچبەریگە خوەرەگە داگەسەلی ومردگە.
وەگورەی رۆژنامەگە، وینەیگ تر نشان خوەیکوشتن گەنج ئەفریقییگ دەێد لە دویای ئەوە ک لە نیسانەو گیرهاتگە ودی ئومیدی بڕیا.
Sunday Telegraph قسەیل گیرهاتگەگان کردە بەڵگەنامەیگ لەبان رەوشەیلیگ دڵتەزن لەو ناوەندەیل گیرهاوردنە سعودیەگان.
لەزووان کۆچبەرە گیرهاتگەگان وت؛ ک کەفتنەسە وەر دەسدریژی لە پاسەوانەگان ک ناونەسەق نەتەوەگەرایەتی وەپیان ئووشن.
ئەبیی ئەسیوپی وت: ئیرا دوزەقە، جوور ئاژەڵ وەگەردمان رەفتار ژەن و رووژانە دەسدریژی لەلیمان کەن، و ئەگەر ری واینەیگ لەی کامپە پەیا نەکەم ئەوسا خوەمکوشم.
وتیش: تەنیا تاوانەگەم ئەوەسە لە وڵاتەگەم دەرجگم ئەرا ژیانیگ خاستر، گشتیان وە قەمچی ووایەر کەهرەبا دەنەلیمان، چمان پیاو کوشتیمنە.
دەسەڵاتەیل سعودیە دەسکردنە گیرهاوردن کۆچبەرە ئەفریقیەگان وەختا پەتای کۆڕۆنا لە ئادار گوزەیشتە رەسیە وڵاتەگە، وترسیان نەگ کۆچبەرەگان هەڵگر ڤایڕۆسەگە بوون.