شەفەق نیوز - وەدۊاچگن

 رووژنامەی "وول ستريت ژۆرنال"، لە زوان سەرچەوەیل ئاگادار، ئاشکرا کرد کە ولاتەیل یەکگرتگ بەشیگ لە دەوڵەتەیل کەنداوی ئاگادار کردگە لە هەوەجەی ئامادەکاری ئەرا ئۆپراسیۆنیگ سەربازی کوڵ و خەس دژ وە ئیران، لە سای جویلەیل سەربازی ئەمریکی و ئیسرائیلی کە ئامانجیان لاوازکردن تەهران و ناچارکردنی ئەرا گلەوخواردن ئەرا دانوسەنین.

 وەپەی رووژنامەگە، ئی پەیوەندییەیلە لەڕی کەناڵەیل دبلۆماسی و سەربازییەو هاتن، لەناو ئامادەکارییەیل کە بارکردن سیستەمەیل وەرگری ئاسمانی و گلەوخواردن ئەمبارکردن تەقەمەنی و ئامادەکردن فڕۆکەیل پەلاماردەر و جەنگی لەخوەی گرێد، بیجگە لە جویلەیل ئەرا وەهیزکردن بوسن دەریایی ئەمریکی لە ناوچەی خوەرهەڵات ناوڕاس.

 زانیارییەیل لە ڕاپۆرتەگە دیاری کەن کە ئامادەکارییەیل بارکردن سیستەم "پاتریۆت" لە ڤیلایەتی تێکساس ئەرا ناوچەگە لەخوەی گرێد، وەگەرد هاتنەناو بڕیگ لە وەشنەیل زیاییگ ئەرا هەڵگر فڕۆکە و یەکەیل لە پیادەی دەریایی ئەرا هێزەیل ئەمریکی لە خوەرهەڵات ناوڕاس لە ماوەی مانگی ئاینده.

یەیش لە وەختیگ تیەێد کە سەرۆک ئەمریکی دۆناڵد ترەمپ بڕیار کۆتایی خوەی لەباوەت دەسکردن وە پەلاماریگ نوو یەکلا نەکردگە، لەناو باسکردن لەبڕیارەیل سەربازی کە شایەت بەش بنەڕەتی و دامەزراوەیل ئەتۆمی ئیرانی وەئامانج بگرن، لە وەرچەرخانیگ لە ڕێڕەو فشار ئابووری و گەمارۆی دەریایی.

لە وەرانوەر ئەوە، شرۆڤەکارەیل هوشداری دەن کە پەلامارە سەربازییەیل شایەت نەوونە مدوو رمیان رژیم ئیرانی، بەڵکم شایەت وەرەو زیاییبون تونڕەوی بچن، و وتیش کە خاوەندارێتی تەهران لە پشتدەسەیگ لە مووشەکەیل بالیستی و توانای لە نوو دروسکردن توانایەیل سەربازییەیلی دیرێد.

 ئیران هوشداری دا کە هەر پەلاماریگ نوو وە وەڵامدانیگ وەرگردیە کە بەرژەوەنییەیل و ئامانجەیل لە ناوچەگە وەئامانج بگرێد، ئەوەیش رخباری دەوڵەتەیل کەنداو لە فراوانبۊن مەودای رویوەڕویبۊنەیل دروس کەێد، لە وەختیگ کە تەقەلا دەێد ئەرا وەهیزکردن وەرگرییە مووشەکییەیلی وەپەی چەوەڕی ئەرا هەر ئاڵووزیگ.

لە روی دبلۆماسییەو، تەقەلایەیل هەرێمی وەردەوامن ئەرا زينگەوکردن دانوسەنین و دژایەتیکردن رویوەڕویبۊنیگ نوو، وەلی تا ئیسە هیچ پیشکەفتنیگ نەکردگە، لە سای ناکۆکییەیل لەباوەت مەودای وتووێژەیل؛ چونکە واشنتۆن زوور خەێدە بان دۆسیەی ئەتۆمی، لە وەختیگ تەهران رکدارە لەبان داواکارییەیل و مەرجەیل خوەی.

 شرۆڤەکارەیل دوینن کە شایەت ترەمپ تەقەلا بکەێد، لەڕی هەر جویلەیگ سەربازی ئەرا دەسهاوردن دەسکەفتەیل سیاسی کە ڕی بیەن ئەرا کەمەوکردن بەشداریکردن ئەمریکی لە ناوچەگە، وەگەرد ئەوەیش کە وەخت هەر پەلاماریگ یا قەوارەی هێمان یەکلا نەکریاسەو، وەپەی داتایەیل ڕاپۆرتەگە.