شەفەق نیوز/ ئیبراهیم رەئیسی سەرۆک ئیران، ئمڕوو چوارشەممە، وینەی قسم سولەیمانی فەرماندەی فەیلەق قودس لە سوپای پاسدران ئیران بەرزەو کرد.

رەئیسی لە وتارەگەی لە کۆمەڵەی گشتی نەتەوە یەکگرتگەیل لە ئەمریکا وت: کەسیگ جویر سلێمانی جەنگ تیرۆر نەکرد، و داوای سزادان دۆناڵد ترەمپ سەرۆک وەرین ئەمریکا کرد ک فەرمان کوشتنی دا.

وتیش: ناکۆکیەیل وەجەنگ چارە نیەکریەن، وەلێ وە گفتوگۆ، جەنگەیل گرفتەیل چارە نیەکەن وەلێ گفتوگۆ تاوانای ئەوە دیرێد، و هەر دووپات لەبان گرنگی هاوکاری ناوبەینمان  ئەرا دەوڵەتەیل ناوچەگە کردیام.

هەمیش وت: ئیمە پەیوەندی وەرد گشت دەوڵەتەیل جەهان خوازیمن وەتایبەت دەوڵەتەیل هاوسا، و دیاری کرد ک ئاسایش ناوچەگە بایەتە لەناوی پەیا بوود نەگ لە دەیشتی، و یەسە ک ئەرا دەوڵەتەیل هاوسا دووپاتی کردیمن.

سەرۆک ئیرانی وتی: ئەرا هاوسەیلمان دووپات کردیمن ک ئاسایش هەرێمی بایەتە لەناو بوود، و نەبایەت لە دەیشتەو باێد، و سەهیۆنست ک داگیر قودس کردیە نەبایەت لە ئاسایس هاوبەش بوود.

رەئیسی وتیش: تەقەلای دروسکردن چەک ئەتۆمی نیەیمن و نەیش خوازیمن بکەفێدە دەسمان، و لە باوەڕمان شوینیگ ئەرا ئی چەکە نییە، و کۆمار ئیسلامی نیاز دروسکردن چەک ئەتۆمی نەیرێد، و هویریش وەوە نیەکەیمن، ئەوەیش لەبان فتوای ریبەر شۆڕش وە حەرامکردنی.

دیاری کرد ک کۆمار ئیسلامی رێککەفتن ئەتۆمی لە ساڵ ٢٠١٥ واژوو کرد و پابەند وە گشت بەندەیلی بوی و جیوەجییان کرد، باوجی کەفتە وەر کیشانەوەی ئەمریکا لەلی، وتیش: ئیران رێککەفتنەگە وە نیاز پاکی واژوو کرد، و گشت پابەندیەیلی جیوەجی کرد، باوجی ئەمریکا خستەی ژیر پا.