شەفەق نیوز ـ تەهران

پویل ئیرانی، ئمڕوو چوارشەممە، وەردەوامبوی لە داوەزیان وەرانوەر دۆلار ئەمریکی، نرخ پویل ئەمریکی 230 هەزار توومان رەدکرد لە بازاڕ ئازاد، لەناوەین ئاڵشتکاریەیل تونیگ  هاوکات وەرد بەرزەوبوین رویوەرویبوینەیل سەربازی لە ناوچەگە.

وەپای داتایەیل بازاڕ خەرجکردن ئیرانی کە ئاژانس شەفەق نیوز وەدویاچگنی کردیە، نرخ فرشتن دۆلار لە مامەڵەیل نیمەڕوو ئمڕوو چوارشەممە، رەسیە نزیکەی 233 هەزار توومان وەرجە ئەوەگ کەمیگ داوەزێد ئەرا 232,200 تومان، هەمیش نرخ سەنین رەسیە 229,900 تومان.

وەو مانا نرخ دۆلار نزیکەی 3,300 تومان بەرزەوبوی یا   1.44% بەراورد وە رووژ گوزەشتە کە  228,900 تومان بوی، لەماوەی هەغتەیگ دەسکەفت پویل ئەمریکی وەرانوەر تومان  رەسیە  5%.

داوەزیانە نووەگەی پویل ئیران مەوقەی بەرزەوبوین رویوەرویبوین سەربازی ناوەین ئیران و ئەمریکا تێد، وەگەرد درویژەوبوین ئەرا پەلامارداین بارهەڵگرەیل نەفتی و دامەزراوەیل و رێڕەوەیل دەریایی نزیک تەنگەی هۆرمز.