شەفەق نیوز/ تەلەڤزیۆن ئیسرائیل راپۆرتیگ وە توومارکردن ڤیدیۆ لە جادەیل ئیران بڵاو کرد، لەناوی وت ک ئاشکرای نائومیدی دانشتگەیل کەێد، و وەکارهاوردن هووشبەری و لەشفرووشی، و ئابووری شەکەتی نشان دەێد.
وەگورەی رووژنامەی "تایمز ئۆف ئیسرائیل" ئەو راپۆرتە وە یەکەمین ئەرا کەناڵیگ ئیسرائیلی لەناو ئیران لە شۆڕش ١٩٧٩ تا ئیسە دانریەێد، ک لەو وەختەو وڵاتەگە کردە کۆماریگ ئیسلامی .
یەکەم هەڵقەی راپۆرتەگە، ک رووژ یەکشەممە، لەبان کەناڵ ١٢ پەخش کریا، نشان دەێد ک سەرچەوەی سەرەکی نیگەرانی ئیرانیەیلە خوەی سەختی زیندگیە، ک سزایل ناودەوڵەتی لەبان بەڕنامەی ئەتەنۆمی ئیران و سیاسەتەیل حکومەتی هیشت ئاست پەنام ئابووری بەرزەو بوود.
وینەگرەگە سەردان چەن شۊنیگ لە تەهران پایتەخت کرد، تا رای گشتی لە کۊچەیل پڕ لە مەردم و گیاکەر نشان بەێد. راپۆرتەگە وت: جۊلەی هاتوچو و پیسی وا لەو چشتەیل سەرەکیەسە ک فرەی دانیشتگەیل تەهران وەپی سەرقاڵن، و کەناڵە ئیسرائیلیەگە روخسار و ناسنامەی وینەگر راپۆرتەگە و گشت ئەو کەسەیلە شاردەو ک لەناوی دەرکەفتن، وەخاتر مقەیەتیکردنییان لە توڵەسەنین دەسەڵاتەیل ئیران.
کەناڵەگە وت: ئەو وینەگرە ملهڕی کردیە وە گەردینی لەناو تەهران وە کامیرای دەسی، ک هەمیشە شاریەێدەو، ئەرا توومارکردن ژیان رووژانە.
وینەگرە ئیرانیەگە وت: وەداخەو نە ئازادی و نەیش دیموکراتی و نەیش ژیانیگ سرووشتی هەس، لەیرا دیکتاتۆری و دزی و تاوان هەس، خوەم زانم چە کەم، یە بیگومان کار فرە رخبەریگە. وتیش: خوەم وە عاغبەت کارەیلم زانم، وەلێ بایەتە جەنگ بکەیمن و خوەمان نەێمنە دەس، ئومید خوازم وەینزیکە لە دیکتاتۆرەیل ئازاد بۊمن.
لە باکوور تەهران، ک ناوچەیگ دەوڵەمەنترە، راپۆرتەگە باخچەیل ئەو ناوچەیلە نشان دا، ک علمانیەتی فرەترە و کەمتر پشتگیری رژیمەگە کەێد، ک فتوا سەختەیل حکومەت لەناوی جیوەجی نەکریاگە.
بەشیگ لە ژنەیل لەچگ ئیسلامی نەپووشانە، یا فرەجاریش وە شیوەیگ تەوای نیەپووشنەی، و ئەگەر پۆلیس لەلیان داوا کرد، وەپیان ئۊشن لەسەرمان کەفت.
راپۆرتەگە وتیش: هونەرمەنەیل جادەیلە مۆسیقایگ ژەنن ک نەبایەت بژەننەی، و مناڵ دەوڵەمەنەیل ئیران ئاهەنگ سازن، ک پۊل دەنە پۆلیس ناوخۆیی.
لە بازاڕیگ قەرەباڵغ، خاوەن دوکانیگ ئەرای وت ک وەرجە چوار ساڵ بڕیگ قاو وە ٦ مەلیۆن ریاڵ فرووشتیە، و ئیسە رەسێدە ٤٠ مەلیۆن ریاڵ ( ٩٦٠ دۆلار)، و فرە کەس گلەیی ئی گرانیە خستە گەردن رژیم ئیران.
لە باشوور تەهران، وینەگرەگە چەوی کەفتە ئیرانیەیلیگ بی ماوا، لەو دیشتە خوەیان کەنە ژیر پەتو، و یەکیگیان وت: شۊنیگتر نەیرم ئەرای بچم، گرفتەگە هالە ئی دەوڵەتە چۊنکە سەرکردە نەیرێد.
شەوانە، ناوچەگە پڕ لە وەکارهاورەیل هووشبەری بوود ک لەکنار جادەگە نیشن، و کابرایگتر وت: نووڕمە ئی گەنجەیلە ک شۊنیگ نەیرن ئەرای بچن، هووشبەری کیشن تا دڵخوەش بوون، یە گشتی لەوەر نەداری و بیکاری و بیزاریە.
وینەگر راپۆرتەگە هەمیش چەوی کەفتە دۊتەیلیگ لەشفرووشی کەن لە نزیک "جادەیل هووشبەری" خوەیان خەنە نوای ریوارەیل وە ١٥ دۆلار، و یەکیگ لە لەشفرووشەیل وت: داڵگ و باوگم لەبان هووشبەری چاشیانە، و برایلمیش وەیجۊرە، کاریگ لەی وڵاتە نیە، لەکاملا کاریگ پەیا کەێ؟
وتیش: لە کۆتایی هەنای کاریگ پەیا کەێ، خوازن سێکسی وەگەردد بکەن، گشتی لە ئیران خوازێد بەد وەکارد بارێد. ئەراوە بڕیار پەسەنکردن لەشفرووشی دام.