شەفەق نیوز - بەغداد

دۆلار ئمڕوو جمعە وەرەو وەدەسهاوردن دەسکەفتەیل ئەرا سێیەمین هەفتە لەبان یەک تیەێد، وە جیگیربۊنی لە بەرزترین ئاستی لە 17 مانگەو، و رمیان بازاڕ سەنەدات خەرجەیل قەرزکردن لە ئاست جەهان دا وەرەو بەرزترین ئاستەیلی لە چەن دەیەیگەو، لە ناوڕاس رخەیل لە هەڵاوسان وە مدوو بەرزەوبۊن نرخەیل نەفت.

 وەبەرهەمهاورەیل تویش شۆک بۊن لە ئەنجام شەپۆل فرووشتن جەهانی تیژیگ ئەرا سەنەدات دۊکە پەنجشەممە، کە وەردی دەسکەفتەیل سەنەدات خەزانەی ئەمریکی پەیمانەیی ئەرا 10 ساڵ رەسیە 5.344 لەسەد، کە بەرزترین ئاستیە لە ساڵ 2002ەو، ئەوەیش وەرجە دەرچگن راپۆرت وەزیفەیل ئەمریکی کە شایەت کاریگەری لەبان مەزەنەیل پەیوەندیدار وە سیاسەت نەختینەیی لەبان ماوەی نزیک بکەێد.

 وت "راسی ئەوەگ دەسکەفتەیل سەنەدات دۊرومەودا بەرزەو بوون تەنانەت لەژیر سای کەمەوبوین مەزەنەیل ئەرا بەرزەوکردن دەسوەجی نرخەیل سوود ئەمریکی، نیشان دەێد کە باوەتەگە وە شیوەیگ زیایبۊ پەیوەندی وە زیایەی هیشتن سەنەدات دۊرومەودا و رخباریە داراییەیلەو دیرێد، نەک تەنیا وە بڕیار ئایندەی ئەنجومەن یەدەگ فیدراڵی".

 داتایەیل دەرچگ لە رووژ چوارشەممە نیشان دان کە نرخەیل وەکاربەرەیل لە وڵاتە یەکگرتگەیل وە کەمتر لە مەزەنەکریاگ لە ئاب/ ئۆگست بەرزەو بۊن، وەرد هەموارکردنیگ وەرەو داوەزین ئەرا خوەنستن نیشاندەر نرخەیل خەرجییەیل وەکارهاوردن کەسی ئەرا مانگ تەمووز/ یۆلیۆ، کە یەیش هیلێد  مامەڵەکارەیل مەزەنەیلیان ئەرا بەرزەوکردن نرخ سوود ئی مانگە کەمەو بکەن.

 دوو لە دروسکەرەیل سیاسەت لە ئەنجومەن یەدەگ فیدراڵی ئی هەفتە هەڵوێستیگ ئاشکرا وە شیوەیگ نائاسایی دەرخستن وە هەوەجەی گردەوک فرەتر لە داتایەیل وەرجە گردن بڕیاریگ لەباوەت بەرزەوکردنیگ ترەک ئەرا نرخەیل سوود.

 یە فتراق لەبان راپۆرت وەزیفەیل ئەمریکی زیاتر کرد کە بڕیارە دۊاتر لە ئمڕوو دەرچوود.

 گرێبەسەیل ئایندەی ئەرا خاو برێنت لەنوو ئاست 100 دۆلار ئەرا بەرمیلیگ رەد کردن وەرد وەدۊاکەفتن مامەڵەکارەیل ئەرا گفتوگۆ پەککەفتگەیل لە ناوەین وڵاتە یەکگرتگەیل و ئیران ئەرا کووتاییهاوردن وە ململانێ لە خوەرهەڵات ناوڕاس.

 پاوەند ئیستەرلینی لە 1.3187 دۆلار جیگیر بۊ، لە وەختیگ دۆلار ئوسترالی 0.18 لەسەد ئەرا 0.6918 دۆلار داوەزی، و هەردگیان لە دەورگرد نزمترین ئاستەیلیان لە سێ مانگ گەردن، و دۆلار نیوزیلەندی 0.22 لەسەد ئەرا 0.5591 دۆلار داوەزی وە تومارکردن نزمترین ئاست ئەرای لە نۆڤەمبەر/ تشرین دۊەم 2025ەو.

 براشانت نیوناها، گەورە شیەوکەر نرخەیل سوود لەلای تی.دی ئەرا کاغەزەیل دارایی وت "ئاشکراس کە بازاڕەگە تونکردن نەختینەیی لە ئەنجومەن یەدەگ فیدراڵی دویر خەێد. یەیچ جویلەیگ واینە وەرەو پەناگە ئارامەیل کە پاڵنەرەگەی پیشهاتەیلە لە ئەوروپا، و لەی سیناریۆ، مەزەنە کریەێد نیشاندەر دۆلار و یەن لە خود وەخت بەرزەو بوون".

 فرەی هاز دۆلار لە ماوەی دۊایی لەبان هەژمار یۆرۆ هات، چۊنکە ورەی بەرهەمهاورەیل وەرانوەر وە دراو یەکگرتگەگە وە شیوەیگ نەرێنی کەفتە ژیر کاریگەری بەرزەوبۊن رخباریە سیاسییەیل لە ئەوروپا و شۆک وزە کە لە ئەنجام ئەو جەنگە وەردەوامە لە هەفت مانگەو لە خوەرهەڵات ناوڕاس کەفتەسەو.

 یۆرۆ هەمیش تویش سەختییەیل بۊ لە وەرانوەر یەن و فرانک سویسری، لە وەختیگ دەسکەفتەیل سەنەدات فەڕەنسی وەرەو بەرزترین ئاستی لە 14 ساڵەو باز دان وەرد زیایبۊن رخەیل لەباوەت رەوش دارایی لەرزۆک ئەرا فەڕەنسا.