شەفەق نیوز- تاران

دراو ئیرانی، رووژ چوارشەممە، وەردەوام بۊ لە داوەزیان وەرانوەر دراوە بیگانەیل، و ئاستیگ پەیمانەیی نوو تومار کرد، وەگەرد رەدکردن نرخ دۆلار ئەمریکی ئەرا وەربەس 220 هەزار تمەن لە بازاڕ ئازاد، لە وەختیگ شەپول بەرزەوبۊنەگە ئەرا زەڕ و دراوە سەرەکییەیل تر کیشا.

وەپای داتایەیل بازاڕ، نرخ دۆلار رەسیە نزیکەی 220 هەزار تمەن، دۊای ئەوەگ وەرجە دوو رووژ تەنیا لە ئاست 210 هەزار تمەن رەد کردۊد، ئەوەگ پەلەکردن رەوت داوەزین دراو ئیرانی مەوقەی ماوەیگ زەمەنی کەم نشان دەێد.

زەرەدەیل تەنیا لەبان دۆلار نەوسیان، کە نرخ پاوەن ئيستەرلينی لە 297 هەزار تمەن رەد کرد، لە وەختیگ یۆرۆ لە ئاست 255 هەزار تمەن رەد کرد، لە ئاستەیلیگ بیپیشینە ئەرا دراو ئیرانی وەرانوەر دراوە بیگانە سەرەکییەیل.

شەپول بەرزەوبۊنەگە وەگەرد بازاڕ زەڕ ئاڵشت بۇ، کە نرخ سکەی زەڕ ئیرانی لە شیواز نوو ناسریاگ وە ناو "ئیمامی" لە 226 ملیۆن تمەن رەد کرد، لە وەختیگ داتایەیل ناوخوەیی رەسینی لە سەنین و فرووشتن چوارشەممە ئەرا نزیکەی 226.9 ملیۆن تمەن نشان دان.

داوەزین نوو  دراو ئیرانی لە وەختیگ تیەێد کە بازاڕەیل رۊوەڕۊ فشارەیل زیایبۊیگ بوون وە مدوو نووەوبۊن گرژییە سەربازییەیل وەگەرد ویلایەتە یەکگرتگەیل، بیجگە لە سزایەیل و خەرجە ئابوورییە ناوخوەییەیل و بەرزەوبۊن ریژەیل ئاوسان.

دۆلار وەرجەیە لە رووژ دوشەممە لە 210 هەزار تمەن رەد کرد، وەرجە ئەوەگ ئەرا زیاتر لە 220 هەزار لە رووژ چوارشەممە باز بەێد، واتە وە زیایبۊنیگ کە لە 10 هەزار تمەن ماوەی دوو رووژ تەنیا رەد کەێد.