شەفەق نیوز/ میدیایل خوەئاوایی، ئمڕوو یەکشەممە، راگەیانن کە دەیان کەس لە پەلامارەیل فڕۆکەی بێفڕۆکەوان رووسیا لە ئۆکرانیا کوشیان و زەخمدار بوین، رووسیایش راگەیان کە یەکەیل وەرگری ئاسمانی نواگیری نزیکەی 100 فڕۆکەی بێفڕۆکەوان ئۆکرانی کردنە یا لەناویان دانە، لەناویان بەشیگیان تەقەلا دانە مۆسکۆی پایتەخت بکەنە ئامانج.

لە کیێڤ، وە پەلامارەیل رووسیا لە شەویگ هەفت کەس کوشیان، وەرپرسەیل وتن: یەیش لە چوارچیوەی  پەلامارەیل ناوەین کیێڤ و مۆسکۆ کە هاووەخت بوی وەرد ئاڵوگۆڕیگ گەورەی دیلەیل، لە ناوچەی خمێلنیتسکی لە خوەئاوای ئۆکرانیا چوار کەس کوشیان و سێ کەسیش لە کیێڤ کە ئەرا دویەم شەو لەبانیەک پەلامار دریا.

وەرپرسیگ ئۆکراینی بڵاوی کرد کە پەلامارەیل رووسیا لە کیێڤ پایتەخت لە شەویگ سێ کەس کوشتنە، وەرجەیە کاروەدەسەیل ئۆکرانیا راگەیانن کە لەوەر پەلامار فڕۆکە بێفڕۆکەوانەیل رووسیا لە شەویگ وەبان کیێڤ پایتەخت ئۆکرانیا و ناوچەیل دەورگردی لەلای کەمەو ١٠ کەس زەخمدار بوین.

شەویگ وەرجەیە، لە ئەنجام پەلاماریگ فڕۆکەی بێفڕۆکەوان رووسیا وەبان کیێڤ، لەلای کەمەو ١٥ کەس زەخمدار بوین.

ڤۆلۆدیمیر زێلێنسکی، سەرۆک ئۆکرانیا راگەیان، ٢٥٠ پەلامار فڕۆکەی بێفڕۆکەوان و ١٤ پەلامار مووشەک بالیستیکی توومار کریاس.

لەلاییگ ترەک، رووسیا راگەیان کە شەوەکی رووژ یەکشەممەڕ لەلایەن فڕۆکە بێفڕۆکەوانەیل ئۆکرانیا پەلامار دریاس، وتیش: ریگری نزیکەی 100 کریاس یا لەناو دریاس، کە بەشیگیان مۆسکۆی پایتەخت کردنەسە ئامانج.

وەزارەت وەرگری رووسیا بڵاو کردکە یەکەیل وەرگری ئاسمانی، تەنیا لە ماوەی چوار ساعەت 95 فڕۆکەی بێفڕۆکەوان ناوبردن، له ناوەیان دوو فڕۆکه وەرەو مۆسکۆ چگن، بەڵام فرەیان وە ئاسمان ناوچەیل ناوڕاس و باشوور وڵات چگنە.

وەزارەت وەرگری رووسیا وتیش: "30 فڕۆکەی بێفڕۆکەوان وەبان خاک ئۆبلاستی برایانسک، 20 فڕۆکە وەبان ئۆبلاستی بێلگۆرۆد، 17 وەبان ئۆبلاستی کورسک، 16 وەبان ئۆبلاستی ئۆریۆل، 5 وەبان ئۆبلاستی کالوگا و 4 وەبان ئۆبلاستی تولا، دوو فڕۆکەی بێفڕۆکەوان ترەک وەبان ئۆبلاستی مۆسکۆ و یەکیگیش وەبان کریمیا خریانەسە خوارەو".

چالاکیی فڕۆکەی بێفڕۆکەوان بویە مدوو بەسیان سێ فڕۆکەخانەی مۆسکۆ تا ماوەیگ و لە رووژ چوارشەممە ٢١ ئایار وەرگری ئاسمانی رووسیا ١٠٧ فڕۆکەی بێفڕۆکەوان ئۆکراینی خستیەسە خوارەو کە تەقەلا دانە لە ئاسمان پایتەخت رووسیا نزیکەو بوون.