شەفەق نیوز- واشنتۆن

رۆژنامەی نیۆیۆرک تایمز، رووژ شەممە، خەوەر دا کە حکومەت ئەمریکی ئاست ئامادەباشی لای فەرمانبەرەیلی لە سەرتاسەر خوەرئەڵات ناوڕاس بەرزەو کردگە، و گامەیلیگ گرۆەسە وەر ئەرا کەمەوکردن شمارەی کارکەرەیل لە باڵوێزخانە و کونسوڵخانەیلی لە ناوچەگە.

 رۆژنامەگە لە زوان وەرپرسەیل ئەمریکی وت کە ئاست ئەو هەڕەشە کە ئیران دروسی کەێد ئەرا ئەمریکییەیل لە خوەرئەڵات ناوڕاس رەسیەسە بەرزترین ئاستەیلی لە هەڵگیرسان جەنگەگە لە شوبات / فێبرایەر گوزەشتەو.

وەرپرسەیل، دەسنشان ئەرا ئەوە کردن، کە توانای ئیران لەبان ئەنجامداین پەلامارەیل لەناو ویلایەتە یەکگرتگەیل هێمان دیاریکریاگە، لە وەختیگ دۆناڵد ترەمپ سەرۆک ئەمریکی زانیارییەیل دەورەیی لەباوەت هەڕەشەیلیگ وەرگرێد کە لە ناوچەی خوەرئەڵات ناوڕاس رەد کەن.

 کۆتایی وە قسەیلیان هاوردن وە ئەوە کە واشنتۆن داتایەیلیگ دیرێد دەسنشان ئەرا ئەگەر بۊین چەکدارەیل سەروە ئیران لەناو ویلایەتە یەکگرتگەیل کەن، وە دەسنشانکردن ئەوە کە پلانە چەوڕیکریاگە ئیرانییەیل ئەرا وەئامانجگردن ئەمریکییەیل ئامانجەیلیگ لە ئەوروپاییش گرنە خوەی.

هەواڵگری ئەمریکی، رەسیە ئەوە کە ئیران وە شیوەیگ گەورە تەقەلایلی خەسەو کردگە ئەرا وەئامانجگردن دیپلۆماتکارەیل و وەرپرسەیل ئەمریکی لە خوەرئەڵات ناوڕاس و دەیشتی.

ماڵپەڕ "ئەکسیۆس" ئەمریکی باس لەوە کرد، کە ئەو پلانەیل کوشتن ئیرانییە رەسینەسە "قۆناغەیل وەرەونواچگ"؛ و یەیش وەپەی یاداشتیگ کە مێژووەگەی ئەرا 23ی ئۆکتۆبەر / تشرین یەکەم گلەو خوەێد، کە ئەرا مارکۆ رۆبیۆ وەزیر دەیشت مل کریاگە.

 ماڵپەڕەگە رووشنەو کرد کە "لە یاداشتیگ نانهێنی، جای کلایتۆن وەڕیەوبەر هەواڵگری نیشتمانی هوشداری دا رۆبیۆ وەزیر کە زانیارییە هەواڵگرییەیل پەیوەندیدار وە پلانەیل تیرۆرکردن ئیرانی هەوەجەس بڕەسنە شمارەیگ گەورەتر لە تاکەیل ئەمریکی لە وەراورد وەوانە کە ئیسە ری وەپیان دریاس ئاگادار بوون لەلی".

 دەسنشان ئەرا ئەوە کرد کە "یاداشتەگە ئامانجەیل دیاریکریاگ، یا وڵاتەیل دەیشت ناوچەی خوەرئەڵات ناوڕاس، یا سروشت پلانەیلە دیاری نیەکەێد، وەلی دەسنشان ئەرا ئەوە کەێد کە ئەو زانیارییە هەواڵگرییەیلە کە پشت بەسنە پی، وەرجە یە وەرد وەرپرسەیل گەورە لە وەزارەت دەیشت بەشدار کریانە".

 وەرپرسەیل ئەمریکی ئاشکرا کردن کە ئی زانیارییە هەواڵگرییەیلە یەکیگ لەو هوکارەیلەس کە تەکان وە وەزارەت دەیشت نانە ئەرا کەمەوکردن شمارەی فەرمانبەرەیلی لە چەن باڵوێزخانەیگ ئەمریکی لە سەرتاسەر خوەرئەڵات ناوڕاس، و یەیش لە سای زیایبۊن رخەیل لە هەڵگیرسان ململانێیگ هەرێمی وە شیوەیگ فراوانتر.