شەفەق نیوز/ فاتمە موعتەمدئاریا، خانمە ئەکتەر ناودار، لە  سینەما و شانۆی ئیران، لە ڤیدیۆیگ وە زبری ڕەخنە لە تونوتیژیەیل کۆمار ئیسلامی دژوە گەنجەیل وڵاتەگەی گرێد، و ئویشێد: ''من ژن وڵات بکوشەیل نییم''.

فاتمە موعتەمدئاریا لەباوەت کاریگ شارەوانی تەهران ک کۆلاژ وینەی  ژنەیل ناودار لە دیواریگ مەیدان وەلیعەسری تەهران هەڵوەسایە، لە ڤیدۆگە وەدەم گریانەو وە تونی ڕەخنە گرێد و ئویشێد: خوەی وە داڵگ گشت قوربانیەیل کوشتن و بڕین حکومەت تەهران زانێد، و داوا کەێد وینەگەی ئەو داگرن.

ئەو خانمە ئەکتەرە  ئویشێد: وینەگەم لە دیوارەگەی مەیدان وەلیعەسر داگرن''.

هەمیش ئویشێد: ''لە وڵاتیگ ک گەنجەیل و دویەتەیل و لاوەیل ئازادیخواز لە مەیدانیگ کوشن، خوەم وە ژن دانیەنەم، من داڵگ مەهسا (ژینا) و سارینا و گشت ئەو گەنجیلەم ک لەی وڵاتە کوشیان، من داڵگ گشت وڵات ئیرانم، من ژن وڵات بکوشەیل نییم.