شەفەق نیوز/ خانمە ئەکتەریلیگ فەرەنسی، جویر جولێت بینوش و ئیزابیل ئۆبیر چەبگ لە گیس خوەیان بڕین، لە ناڕەزاییان وەبان مردن ژینا ئەمینی، ئەو دویەت کورد ئیرانە، ک لە گیرهاوردنی لەلایەن پۆلیس ئەخلاق لە وڵاتەگەی گیانی لەدەسدا.

ژینا ئەمینی لە تەمەن ٢٢ ساڵان، لە ١٣ی ئەیلوول، لەوەر خاس نەپووشی لەچگ سەری لە تەهران دەسگیر کریا، و دویای سێ رووژ لە خەسخانە گیانی لەدەسدا، ک لەبان ئەوە ناڕەزاییەیل گەورەیگ نریاوە، وزیاتر لە ١٣٠ کوشیان لەناویان کەفت.

بینوش هەناێ چەپگ گەورەیگ لە گیس خوەی بڕێد وەت "وەخاتر ئازادی"  و نشان کامیرا دادەی.

بڕیگ لە ناودیارتین خانمە ئەکتەر وگورانیچڕەیل فەرەنسا کەفتە وەرد بینوش لەی کارە، جویر مارجۆن کوتیار و ئیزابیل ئەدجانی.

ریشار سیدیۆ ئەو پارێزەرە ک دەسوە هەڵمەتەگە کرد، وت: خانمە ئیرانیەیل چەوەڕی پشتگیری لە کۆمەڵگای ناودەوڵەتی کەن، ویەیش شیوەی خاسیگە ئەرا نشاندان ئەو پشتگیریە.

خانمە دادپەروەر سویدی عەبیر سەهلانی، مەوقەی وتاریگ لە یەکێتی ئەوروپا لەباوەت ناڕزاییەیل ئیران لە پەرلەمان ئەوروپا لە شار ستراسبۆرگ، رووژ سێشەممەی گوزەشتە، ئەویش لەو مەوقە گیس خوەی بڕێد.

رۆیتەرز لە زوان سیدیۆ وت: یە تەنیا یەکەمین گامە، و ئومید خوازم گشت مەردمەیل جەهان لەشوینی گام بنەن، نەگ تەنیا خانمە ئەکتەرەیل، وەلێ گشتی، هەمیش پیاوەیل توەنن قژ خوەیان بووڕن، و مەزەنە کەم یەیش بوود.

خانمە پارێزەرە و کەسایەتیەیل راگەیانن وژنەیلیگتر لە فەرەنسا لەی هەڵمەتە بەشدار بوین.