شەفەق نيوز/ عەلی خامەنەئی ریبەر باڵای ئیران، ئمڕوو چوارشەممە، هەڕەشەی سزادان ئیسرائیل دا لەوەر کردەوە "هەڵە گەورەگەی"، دووپاتیش کرد کە ئیران نیەوەخشێد و لە هویرەو نیەوەێد، لە خود وەختیش دووپات کرد کە هیزەیل چەکدار وە پشتگیریکردن گەل ئامادەن.
ریبەر ئیرانی لە قسەیلی کە ئاژانس "تەسنيم" ئیرانی بڵاوی کرد وت: قەوارەی سەهیۆنی هەڵەی گەورەیگ کرد، و ئەوەسا سزای ئەو کردەوەیە بەێد، وتیش: ئیران لە قەوارەی سەهیۆنی نیەوەخشێدر و خوین شەهیدەیلی لە هویرەو نیەوەێد.
وتیش: هیزەیل چەکدار ئیمە ئامادەن ئەرا وەرگریکردن لە نیشتمان، و لەلایەن وەرپرسەیل و گشت گەل پشتگیری کریاس، دووپاتیش کرد کە بایەسە ئەمریکیەیل خاس بزانن کە هەر دەسوەردانیگ سەربازی لەلایەن ئەوانەو وە زەرەدەیلیگ وەرانوەریان گریەێد کە چشتیگ شوینیان پڕەو نیەکەێد.
وتیش: گەل ئیران رەفتاریگ دانا و ئازا و هویرد لە مەوقەگە نشان دا لە نواگیریکردن دوژمنایەتی سەهیۆنی، کە ئەوەیش دانایی دیاریگ و موڕاڵ بەرزیگ لەناو کۆمەڵگای ئیرانی نشان دەێد.
دووپاتیش لە خوەیڕاگری گەل ئیران کرد لە نواگیریکردن هەرلە ئەو جەنگ و ئاشتیە کە چەسپیاس، وتیش: ئیران سەر ئەرا هەر جویریگ لە فەرمانەیل نەچەمنێد.
باس قسەیل دۆناڵد ترەمپ سەرۆک ئەمریکا وە هەڕەشە و بیتام کرد، وتیش: کەسەیل دانا کە میژوو ئیران و گەلی زانن زوان هەڕەشە وەرانوەر ئی گەلە وەکار نیارن کە قەت سەری نیەچەمیەێد.
قسەیل خامەنەئی وە بەیاننامەیگ نویسیاگ تیەێد لە وەڵامدان بانگەواز دۆناڵد ترەمپ سەرۆک ئەمریکا وە چووڵکردن تەهران، و هەڕەشەی ئاشکرای وە تیرۆرکردن ریبەر.