شەفەق نیوز/ سایت "ئای ٢٤ نیوز" لە زوان چەن سەرچەوەیگ وت: سوریەیل داوا لە ئیران کردنە واز بارێد لە پەلامارداین ئیسرائیل لە زەویەیل سوریا، تا نەڕەسێدە جەنگ گەورەیگ.

ئەو راپۆرت ئیسرائیلیە ک ئاژانس شەفەق نیوز ئەڵگەردانی کرد، پشت وە چەن سەرچەوەیگ بەساد، لەناویان "سەرچەوەیگ لە دیمەشق" ک رووژنامەی نیویۆرک تایمز ئەمریکی وەگورەی قسە کردیە.

راپۆرتە ئیسرائیلیەگە لە زوان تۆێژینەر ئیرانی قەیس قورەیشی لە لەندەن کرد ک وت نزیکە لە حکومەت ئیران، وتیە هیزەیلیگ هاوپەیمان ئیران لە ناوچەگە گردەوبوینیگ لەبان ئەنتەرنێت وەرجە ساڵیگ کردنە، لەناوی باس ئەوە کردنە ک چوین بەرسڤ پەلامارەیل ئیسرائیل لەبان سوریا بیریەێد ک شوینەیلیگ ئیرانی کەنە ئامانج.

راپۆرتەگە دیاری کرد ک پسپۆڕەیلیگ سەربازی لە سوریا و عراق ویەمەن و حزبولڵای لوبنان و هیز قودس لە سوپای پاسداران ئیران لەناو ئەو گردەوبوین ئەلیکترۆنیە بەشدار بوینە.

وتیش: لەناو گردەوبوینەگە، وەرپرسەیلیگ سوری داوا لە ئیران و هاوپەیمانەیلی کردنە واز لە پەلامارداین ئیسرائیل لەخاک سوریا بارن، و ئی هەڵویستە هیشت هیزیل هاوپەیمان ئیران پەلامار شوینەیلیگ ئەمریکی لەجیای ئەوە بیەن، ئەوەیش وە ئومید زوورکردن ئەمریکا لەبان ئیسرائیل تا گورزەیلی لەبان سوریا بووسنێد.

وەرپرسەیلیگ ئەمریکی ناودیار ئەرا نیویۆرک تایمز وتن: پەلامارەیل فڕۆکەیل بێفڕۆکەوان لەبان سەربازگەی تەنف ئەمریکی لە سوریا لە ١٥ی ئاب، فرە لە پەلامارەیل وەرین ئاڵووزتر بوی، و شایەت تەقەلایگ لەلایەن ئیران بوود تا بەرسڤ پەلامارەیل ئیسرائیل بکەێد.

راپۆرتەگە وتیش: وەرجە یەک رووژ لە پەلامارەگەی تنەف، سێ سەرباز سوری وە گورزەیل ئیسرائیل لەبان شار تەرتووس و نزیک دیمەشق کوشیان.

ئەڵگەردان: ئاژانس شەفەق نیوز