شەفەق نیوز - سەنعا

هیزە چەکدارە یەمەنییەیل سەروە کوتلەی "ئەنساروڵا"ی حووسی، ئمڕوو سێشەممە، خەوەردا لە کردنە ئامانج دامەزراوە نەفتییەیل سەروە کۆمپانیای "ئارامکۆ" لە چەن شاریگ لەناو سعودیە، دووپات کرد کە ئەو پەلامارەیلە تیەێد چۊ وەڵامیگ ئەرا کردنە ئامانج پارێزگایەیل "مەئرب و بەیزا و حودەیدە و تەعز و جەوف" و زیندان ناوەندی لە شار "حەزم" وە دەیان پەلامار ئاسمانی لەناو خاکەیل یەمەنی کە بۊە مدوو کەفتن شمارەیگ "گەورا" لە قوربانییەیل لە زیندانییەیل و ژنەیل و مناڵەیل سەردانیکەر.

 هیزە چەکدارەیل لە بەیاننامەیگ دیاری کردن، کە "ئۆپەراسیۆنیگ سەربازی چوینایەتی و فراوان جیوەجی کردنە، کۆمپانیای ئارامکۆ لە ئەبها و نەجران و شار ئابووری و ئارامکۆی جیزان، و بنکەی ئاسمانی خەمیس موشەیت وە دەیان مووشەک بالیستی و فڕۆکەی بی فڕۆکەوان کردنەسە ئامانج و گورزەیل وە فەزڵولڵا ورد و راستەوخۆ بۊنە مدوو زەرەدەیل گەورایگ لەو دامەزراوەیلە".

 دووپات لە وەردەوامبۊنی کرد لە "ئۆپەراسیۆنە سەربازییەیل وەرەو قویلی سعودیە و کردنە ئامانج گردەوبوینەیلی و لە چەسپانن هاوکیشەی گەمارۆ وە گەمارۆ تا وسانن دەسدریژی و هیزدان گەمارۆ لەبان یەمەن".

یەیش هاوەختە وەگەرد خەوەرداین وەزارەت وزەی سعودیە، شەوەکی ئمڕوو سێشەممە، لە کردنە ئامانج شمارەیگ لە دامەزراوە و شوینەیل کەرت وزە لە ناوچەی باشوور شانشینەگە، دیاری کرد کە پەلامارەیل بۊنە مدوو هیزگردن ئاگرەیل و وسانن وەختانەی بەشیگ لە کارەیل وەڕێوەبردن، بیجگە لە زەخمداربۊن شمارەیگ لە هاووڵاتییەیل و نیشتەجیەیل.