شەفەق نیوز/ فەرماندەیی حزبولڵای لوبنان، ئمڕوو سێشەممە، هەڵوژاردن شێخ نەعیم قاسم جویر ئەمیندار گشتی حزبەگە راگەیان، لە شوین حەسەن نەسرولڵا کە وە گورزیگ ئیسرائیلی لە زاحیەی باشوور لە ٢٧ ئەیلوول گوزەشتە گوشیا.
حزبەگە لە بەیاننامەیگ وت: شورای حزبولڵا هاوڕا بوی لەبان هەڵوژاردن شێخ نەعیم قاسم جویر ئەمیندار گشتی حزبولڵا، پەیمان کارکردن وەیەکەو دەیمن ئەرا وەجیهاوردن بنەمایل حزبەگە و ئامانجەیل ریەگەی.
قاسم جیگر ئەمیندار گشتی حزبولڵا بوی، ئەو حزب سیاسی و سەربازی و کۆمەڵایەتیە، کە زەمینەی جەماوەری و زاڵ و گەورەیگ دیرێد لەناو تایفەی شیعە لە لوبنان.
نەعیم کوڕ محمد نەعیم قاسم، لە شوبات ١٩٥٣ لەداڵگبویە لە ناوچەی بوستا ئەلتەحتا لە شار بەیروت، ژن و شەش کوڕ دیرێد، تا قزناغویل باڵا لە حەوزە لە لوبنان خوەنست، ئەوەیش وەگەرد خوەنەواری ئەکادیمی لە زانکۆی لوبنان لە ساڵ ١٩٧١، کە لیسانس لە کیمیا وەزوان فەرەنسی لە زانکۆی پەروەردە لە زانکۆگە وەدەس هاورد.
قاسم بڕوانامەی ماستەرە لە کیمیا وەدەس هاورد، لە زانکۆی لوبنانی لەساڵ ١٩٧٧، ئیجا تا ماوەی شەش ساڵ بویە مامووستای ناوەندی.
کەفتە ناو بزووتنەوەی بیبەشەیل، فەوجەیل وەرخودان لوبنانی (ئەمەل) مەوقەی دامەزریانی وەدەس ئیمام موسا سەدر لە ساڵ ١٩٧٤، و بویە جیگر وەرپرس رووشنهویری ناوەندی لە بزووتنەوەی ئەمەل.
لە پلەی رێکخستن چگە بان، تا بویە وەرپرس باوەڕی و رووشنهویری، کە یەکیگ لە ئەمیندارەیل بوی لە ئەنجومەن فەرماندەیی بزووتنەوەگە، دویای سەرنقومبوین موسا سەدر لە لیبیا، و سەید حسێن حوسەینی لە ساڵ ١٩٧٨ سەرکردایەتی بزووتنەگە گردە دەس.
دویای شووڕش ئیسلامی ئیران وەدەس خومەینی لە ١١ی شوبات ١٩٧٩ واز لە بزووتنەگە هاورد، تا خوەنەواری حەوزە و کاروبار ئیسلامی خوەی لەناو مزگەفت و حوسەینیەیل لە زاحیەی باشوور تەواو بکەێد.
لە ساڵ ١٩٩١ لە وەختیگ عەباس موسەوی ئەمیندارێتی گشتی حزبولڵا وەرگرد، نەعیم قاسم بویە جیگر ئەمیندار گشتی حزبەگە، و لە پۆستەگە وەردەوام بوی دویای کوشیان موسەوی، کە لە ساڵ ١٩٩٢ حەسەن نەسرولڵا بویە ئەمیندار گشتی حزبەگە.