شەفەق نیوز- نایپیداو
دەسەڵاتەیل لە بۆرما، ئمڕوو جمعە، خەوەردان لە بەسانن فڕۆکەخانەی ماندالای، دۊەم قەرەباڵغترین فڕۆکەخانە لە وڵاتەگە، ئەرا دوو رووژ لە ئمڕووەو، دۊای ئەوەگ حکومەت پشتگیریکریاگ لەلایەن سوپاوە، یاخیبۊەیل پشتگیریکەر ئەرا دیموکراسی تاوانبار کرد وە پەلامارداین فڕۆکەخانەگە وە فڕۆکەیل بی فڕۆکەوان.
فڕۆکەخانەی ماندالای وە ناوەندیگ سەرەکی ئەرا گەشتەیل ئاسمانی ناوخوەیی و ناودەوڵەتی لە ناوڕاس بۆرما هەژمار کریەێد، باوجی کۆمەڵەیل مەدەنی تایبەتمەن لە چەودیاریکردن پەلامارەیل نشان دەن هەمیش ئەرا وەکارهاوردنی چۊ نیشتنەگەیگ ئەرا فڕۆکە سەربازییەیل کە گەشتەیل ئاسمانی جەنگی جیوەجی کەن.
حکومەت پشتگیریکریاگ لەلایەن سوپاوە لە بەیاننامەیگ دیاری کرد کە شەش فڕۆکەی بی فڕۆکەوان "خوەیکوشی" دۊای نیمەڕو دۊکە پەنجشەممە پەلامار فڕۆکەخانەگە دان، ئەوەیش بۊە مدوو پەکخستن خشتەیل گەشتەیل ئاسمانی بی تومارکردن زەرەدەیل گیانی.
وەگەرد ئەوەیش، سەرچەوەیگ ئەمنی ئەرا ئاژانس "فرانس پرێس" وت، کە "فڕۆکەخانەی ماندالای ئمڕوو و سوو بەسیاگە"، هەمیش وت کە "پەلامارەگە لە دۊرییگ لە باڵەخانەی فڕۆکەخانەگە رۊی داگە، باوجی بڕیار بەساننی دریاگە چۊ رێکاریگ خوەپارێزی".
هەمیش وەرپرسیگ ئەمنی دۊیەم کە لە فڕۆکەخانەیگ تر بۆرما کار کەێد و هەمیش داوای ئاشکرانەکردن ناسنامەی خوەی کرد، دووپات کرد کە فڕۆکەخانەی ماندالای، دۊەمین گەوراترین شار وڵاتەگە، تا رووژ یەکشەممە "بەسیای مینێد ئەرا خاسەوکردن".
هیزە چەکدارەیل لە بۆرما ئاگر جەنگیگ ناوخوەیی هەڵایسانن دۊای جیوەجیکردن کودەتاییگ لە ساڵ 2021، وە ئەوەیش کووتایی وە ئەزموونیگ دیموکراسی هاورد کە ئەرا ماوەی دەیەیگ وەردەوام بۊ لەڕی رمانن حکومەت ئۆنگ سان سو چی.
دۊای چەن ساڵیگ لە ململانێیەگە، ئیرەنگە سوپاگە پەلامارەیل وەردەێدە بان چەن کۆمەڵەیگ یاخیبۊ کە پشتگیریکەرەیل ئەرا دیموکراسی و کەمینەیل نەتەوەیی لەخوەی گرێد کە ماوەی گشت ئەو وەختە دژ وەپییان جەنگیاد.
پەلامار فڕۆکەیل بی فڕۆکەوان کە دۊکە پەنجشەممە رۊی دا، نۊنەرایەتی دانپیادانیگ دەگمەن بۊ وە جیوەجیکردن پەلاماریگ لەلایەن یاخیبۊەیلەو لە یەکیگ لە گەوراترین ناوچە شارستانییەیل لە بۆرما، کە ئەوانیش ناوچەیلیگن وە گشتی چۊ قەڵایەیل کۆنتڕۆڵکریاگ لە ژیر دەسەڵات سوپاگە مەنینە.
حکومەتەگە بوخت پەلامارەگە خستە بان جەنگاوەرەیل یاخیبۊ پشتگیریکەر ئەرا دیموکراسی کە دۊای کودەتاگە چەک هەڵگردنە، و کۆمەڵە سەرەکییان وە ناو "هیزەیل وەرگری میللی" ناسریاگە.
بەیاننامەی حکومەتەگە دیاری کرد کە پەلامارەگە فڕۆکەخانەگە کردیەسە ئامانج، و وەسفی کرد وە ئەوە کە "دامەزراوەیگ گواستنەوەی گشتی نەسەربازییە".
نەتۊنریا چەسپیاگ بوود کە ئایا شوین پەلامارەگە تایبەتمەنییگ مەدەنی یا سەربازی دیرێد، باوجی پەیامنێرەیل ئاژانس "فرانس پرێس" وەرجەیە چەودیاری فڕۆکە سەربازییەیل کردنە کە لەبان فڕۆکەخانەی ماندالای فڕینە.
هەر یەک لە کۆمەڵە یاخیبۊیەیل و سوپا لە بۆرما فڕۆکەیل بی فڕۆکەوان لە جەنگ ناوخوەییەگە وەکارتیارن، کە مەزەنەی بەشیگ لە لایەنە چەودیارەیل نیشان دەن ئەرا ئەوە کە بۊەسە مدوو لەدەسداین گیان زیاتر لە 100 هەزار کەس.
وەگەرد ئەوەیش، شیکارەوانەیل دوینن کە هیزە ئاسمانییەیل سەروە سوپا، کە وە فڕۆکەیل دروسکریاگ چین و رووسیا ئامادە کریانە، رۆڵیگ گرنگ لە رۊوەڕۊبۊن وەگەرد باڵە یاخیبۊیەیل دینە.