شەفەق نیوز/ بۆریس جۆنسۆن سەرۆک وەزیرەیل بەریتانیا، ئمڕوو پەنجشەممە، دەسکیشانەوەی لە سەرۆکایەتی حزب پارێزگارەیل وەشیوەیگ فەرمی راگەیان، ودووپات کرد ک تا یەکیگ لە شوینی پەسەن کریەێد، ئەوەسا لە ئەرک سەرۆک حکومەت وەردەوام بوود. 

جۆنسۆن لە وەردەم شوین نیشتەجیبوینی لە لەندەن پایتەخت وت: لەی رووژەیلە فرە رەنج دعم تا وەردەوام بووم، چوینکە هەس کردم ک ئەرکم ئەوەسە ک لە سەرۆکایەتی وەزیرەیل وەردەوام بووم. 

وتیش: حکومەت نوویگ دانا وەگەرد وەردەوامیی لە ئەرک سەرۆک وەزیرەیل تا ئەوەنە سەرکردەی نوویگ پەسەن کریەێد.  

وتیش: شانازی وە ئەنجامەیل حکومەتەگە کەم هەرلە بریکست ودامەزتانن پەیوەندیەیل وەرد کشوەر ئەفریقا تا ئەو یاسایلە ک لە پەرلەمان دەنگ وەپیان دریا، و لەباوەت پەتای کۆڕۆنا و واکسین ودەرچگن لە کەرەنتین، ورەفتارمان لە جەنگ ئۆکرانیا، وئیمە ئەوەسا وەردەوام بویمن لە پاڵپشتیکردن ئۆکرانیا ئەرا ئازادی. 

جۆنسۆن وتیش: بەرنامەی گەورەیگ خستیمنە ری ئەرا بەرهەمهاوردن و ئاوەدانکردنەوە، وئی گەورەترین بەڕنامەس، و توانای جیوەجیکردنه وە هەس وگورجی کۆمەڵگای بەریتانیا بوی، وبایەتە لەی کارمانە وەردەوام بویمن تا وەرەو جیوەجیکردن پڕۆژەیل بکەفیمنە ری.  

هەمیش وت: سەختە لەی وەختە ک سەرکەفتن وەدەس هاوردیمنە حکومەتەگە ئاڵشت بکریەێد، راسە لەچەن باوەتیگ کەفتیمنە دیر، باوجی رەوش ئابووری لە ناوەخوەیی و ناودەوڵەتی فرە سەختە، و وەداخەو ک لە گفتوگۆکردنەیل ئامادە نییم، تا بنووڕمە ئەو را و پڕۆژەیل نووە ک ئەوەسا جیوەجی کریەن.   

وتیش: ئەوەسا سەرکردەی نوویگ تیەێد، و وڵاتەگە وەرەو نوا بەێد لەی رەوشەیل سەخت وئاڵووزە، ودووپات کرد ک سەرۆک حکومەت نوو هەرکەسیگ بوود ئەوەسا گشت پشتگیرییم ئەرای پیشکەش کەم. 

سەرۆک وەزیرەیل بەریتانیا وتیش: هەر لە ئیسە تا داناین سەرۆک نوویگ حکومەت لە کاری وەردەوامە و منیش ئەرا خزمەت ئی وڵاتە وەردەوامم.