شەفەق نیوز/ وەزارەت وەرگری تورکیا، شەفەق یەکشەممە، جیوەجیکردن پەلامارەیل ئاسمانی لەلایەن فڕۆکەیلی لەبان شوینەیل پەکەکە و باڵەیل لایەنگری لە باکوور سوریا و عراق راگەیان.

وەزارەتەگە لەبان تویتەر یەکەمین سیمای گورزەیل ئاسمانی لەبان تویتەر بڵاو کرد، لەبانی نویسان: ئامانجکردن راستەوخۆ ئەرا حەشارگەی "تیرۆرستەیل" و داغانکردنیان.

وەزارەتەگە وتیش: ئی ئۆپراسیۆنە لە بنەمای مادەی ٥١ لە بەڵگەنامەی نەتەوە یەکگرتگەیل تیەێد، ک باس ماف لەخود وەرگریکردن کەێد.

وەگورەی بەیاننامەگە، ئۆپراسیۆنەگە ئەرا مسۆگەرکردن ئاسایش و نواگردن هەر پەلاماریگ تیرۆری تیەێد ک گەل تورک و هیزەیل ئەمنی کەێدە ئامانج، و ئەرا هەڵکەنین تیرۆر لە ریشەو، وە کوشتن ریخریاگەیل تیرۆری جویر "پەکەکە، کەجەکە، یەپەگە".

لەلای خوەییش، کەناڵ تەلەڤزیۆنی "A Haber"  لە زوان سەرچەوەیلیگ لە وەزارەت وەرگری تورکیا وت: سوپای تورکیا سەربازگەیل تیرۆری لە ئەنجام ئەو ئۆپەراسیۆن ئاسمانیە لە باکوور عراق و سوریا ویران کرد، ک شەو یەکشەممە جیوەجی کریا.

وەگورەی کەناڵەگە، زیاتر لە ٥٠ فڕۆکە و ٢٠ فڕۆکەی بێفڕۆکەوان لەو ئۆپراسیۆنە بەشدار بوی.

تووپخانەی تورکیایش پەلامار شوینەیل پەکەکە دان.