شەفەق نیوز- وەدویاچگن

دامەزرینەر هاوبەش کومپانیای "مایکروسوفت"، بیڵ گەیتس، هوشداری لە رخباریەیلیگ دا روی لە زیایبۊن ئەرا وەکارهاوردن بیکونتروڵ زیرەکی دەسکرد، و مەزەنەی بەرزەوبۊن پەلامارە ئەلیکترونییە پاڵپشتیکریاگەیل وەی تەکنیکەیلە کرد لە ماوەی ساڵ ئایندە، لە سای توانای وەکارهاوردنیان لەلایەن کەسەیل نیازگەنەو بی ریسایەیل یا ریکارەیل مقیەتیکردن کارا.

گەیتس، لە دیداریگ وەرد توڕ "ئەی بی سی نیوز" وت، کە رخباری دەسوەجی مەرج نییە خوەی لە دەرچگن زیرەکی دەسکرد لە ژیر کونتروڵ بۊنێدەو، کە ئەگەریگە شایەت لە ماوەی ساڵەیل ئایندە دەربکەفێد، بەڵکم ها لە بەد وەکارهاوردن سیستەمەیل ئیسە لەلایەن کەسەیلیگ کە تۊنن ئەو ریسایەیلە رەد بکەن کە لەناویان چەسپیاس.

وتیش کە پەلامارە ئەلیکترونییەیل ئەو بوارەسە کە مەزەنە کریەێد گەوراترین کاریگەری زیرەکی دەسکرد لە ماوەی ساڵ ئایندە وەخوەیەو بۊنێد، و هوشداری دا لەوەگ گردەوکردن لە ناوەین کەسەیل نیازگەن و نووترین نموونەیل زیرەکی دەسکرد، وەرد نەۊین گەرەنتییەیل پاراستن، شایەت بوودە مدوو پیشهاتەیل کوتوپڕ نەرینی روی لە زیایبۊن.

ئی هوشدارییەیلە هاووەخت تیەێد وەرد ئیمزاکردن نامەیگ واز لەلایەن فرەتر لە 100 کومپانیا کە لە بوار گەشەپیدان زیرەکی دەسکرد کار کەن، کە لەناوی هوشداری دانە لەوەگ پەلامارە سایبەرانییە پاڵپشتیکریاگەیل وەی تەکنیکەیلە پاڵیوراون ئەرا ئەوەگ فرەتر بڵاوەو بوون و پیش بکەفن.

ئی رخ و نیگەرانییەیلە رووشنایی خەنە بان ئەو گرفتە ئەمنییەیلە کە وەرد فراوانبۊن لە وەکارهاوردن زیرەکی دەسکرد تیەن، وە تایبەت وەرد پیشکەفتن توانایەیلی لەبان ئوتوماتیکیکردن ئەرکەیل و شیکردنەوەی زانیارییەیل، و ئەو ئامرازەیلە کە شایەت یە بخەێدە وەردەس پەلاماردەرەیل ئەرا وەهیزکردن پەلامارە ئەلیکترونییەیلیان.