شەفەق نیوز- واشنتن

دۆناڵد ترمب، سەرۆک ئەمریکی شەو پەنجشەممە، باوەڕ خوەی دیاری کرد کە جەنگ وەگەرد ئیران "وەی فرە نزیکە کووتایی تیەێد"،  ئەوەیش ئەرا ئەو مدووە گلەو دا کە ئیرانییەیل "نیەتۊنن لەبان ئی هاڵە وەردەوام بوون".

 ترمب لە لێدوانەیلیگ کە ئاژانس شەفەق نیوز وەدۊای چگ، دووپات کرد کە ویلایەتە یەکگرتگەیل ئیسە کۆنترۆڵ گەروو هورمز کەێد، و گەمارۆی دەریایی دیرن کە هیز دەریایی ئەمریکی سەرکردایەتیی کەێد.

وتیش: "وەختیگ ئەو پرۆسە فرە گرنگە کە پەیوەندی وە ئیرانەو دیرێد دەسوەپیکرد، پرۆسەیگ فرە گرنگ بۊ، چۊنکە ئەوان نیەتۊنن چەک ئەتۆمی  وەدەس بارن، وەنە گشت جەهان تۊش کاولکاری هاتیاد".

هەمیش وت: "ری وە رویدان ئەوە نیەیەیمن، نەک تەنیا ئیمە، و نەک تەنیا خوەرهەڵات ناوەڕاس، بەڵکم گشت جەهان تویش کارەساتیگ بویاتاد. هیچ وژاردەیگ لەنوامان نەۊ".

دیاری کرد کە "من تیکەڵم لە گفتوگۆیل"، و هەمیش وت کە باوەڕ دیرێد کارەیل وەگەرد ئیران وە خاسی وەرەونوا چن.

سەرۆک ئەمریکی دیاری کرد کە ویلایەتە یەکگرتگەیل خوازین فرەتریگ وە تەقەمەنیەیل "وە وەردەوامی" دیرێد، وەلی دووپات کرد کە یەدەگ ئیسەی "لە رەوشیگ فرە خاسە"، بیجگە کەمبۊن بڕیگ لە جۊرەیل.

 لە وەختیگ زۊتر لە ئمڕوو، فەرماندەیی ناوەندی ئەمریکی "سێنتکۆم"، ئاشکرا کرد کە رێڕەو 49 کەشتی بازرگانی ئاڵشت کریاگە لە وەخت دەس کردن گەمارۆی دەریایی لەبان ئیران لە 14ی تەمموز / یۆلیۆ گوزەشتە.

 ترمب، رووژ چوارشەممە، وت کە گەروو هورمز "لە نزیکەو" واز کریەێدەو، ئەگەرنە پەلاماریگ نوو و هازدار لەبان ئیران ئەنجام دەێد.