شەفەق نیوز- وەدۊاکەفتن

دۆناڵد ترەمپ، سەرۆک ئەمریکی رازی بۊ لەبان جیوەجیکردن فەرمان لەسێدارەداین وە گولە وەرانەور پزیشک دەروینی وەرین لەناو سوپای ئەمریکی نیدال مالك حەسەن، کە تاوانبارە وە کوشتن 13 کەس و زەخمدارکردن 32 کەسیگ ترەک لە رویداو تەقەکردنیگ لەناو بنکەی فۆرت هود لە ویلایەت تەکساس لە ساڵ 2009، لە گامیگ کە شایەت بکەێدەی یەکەم لەسێدارەداین کە سوپای ئەمریکی جیوەجیی بکەێد لە ساڵ 1961ەو تا ئیسە.

 قسەکەر وەناو پێنتاگۆن شۆن بارنێڵ، لە پۆستیگ لەڕی سەکوو "ئێکس"، وت کە وەزیر وەرگری پێت هێگسێس ئەرکدار کردگە وە جیوەجیکردن فەرمان لەسێدارەداین  حەسەن وە گولە لەڕی تیمیگ لەسێدارەداین سەر وە سوپاو، و ترەمپ رازی بۊە لەبان ئەوە، لە وەختیگ وەزیر سوپا وەخت جیوەجیکردن و شوینەگەی دیاری کەێد.

 بارنێڵ وتیش کە "رووژ حیساب ئەرا حەسەن لە کووتایی هات".

 حەسەن، کە ئەمریکییگە لە بنەڕەت فەلەستینی، لە 5 تشرین دۊەم/ نۆڤەمبەر 2009 تەقە کردۊد لەناو دامەزراوەیگ پزیشکی لە بنکەی فۆرت هود، کە ئامادەباشی کردیاد ئەرا کلکردن سەربازەیل وەرەو ناوچەیل جەنگ، کە بویە مدوو کوشتن 12 سەرباز لە خزمەت و سەربازیگ خانەنشین، و زەخمداربۊن 32 کەس ترەک.

 حەسەن وە گولاەی پۆلیسیگ مەدەنی زەخمدار بۊ ماوەی دەسگیرکردنی، کە بۊە مدوو تۊشهاتنی وە ئیفلیجییگ نیمچەیی و وەکارهاوردنی ئەرا کورسییگ تایەدار، و بڕیار بۊ لەو وەختە لە ئەفغانستان بڵاو بکریەێد دۊای چەن هەفتەیگ لە پەلامارەگە.

 دادگایگ سەربازی فەرمان لەسێدارەداین حەسەن لە ئاب/ ئۆگۆست 2013 دەرکرد، دۊای تاوانبارکردنی وە 45 توومەت پەیوەندیدار وە کوشتن ئەنقەست و تەقەلاداین ئەرای، لەبان بنەمای تەقەکردن لەناو دامەزراوە پزیشکییەگە لە بنکە سەربازییەگە.

 حەسەن هەڵوژارد کە وەرگری لە خوەی بکەێد ماوەی دادگاییکردنەگە، و وەچەودیەیل یا بەڵگەیل وەرگری پێشکەش نەکرد، هەمیش هاشا لە وەرپرسیارەتی خوەی لە تەقەکردنەگە نەکرد، و پارێزەرەیل دیاریکریاگی لە دادگاگە رخ خوەیان نشان دان لەوەگ کە ئەو تەقەلا دایە ئەرا وەدەسهاوردن فەرمان لەسێدارەداین.

 ماوەی دادگاییکردنەگە، زانیارییەیل دەرکەفتن لەباوەت پەیوەندیی لەڕی ئینتەرنێتەو وەرد پیاو ئایینی ئەمریکی ئەنوەر عەولەقی، کە دەسەڵاتەیل ئەمریکی وە پەیوەندیدار وە ریخریاگ قاعیدە دانانەی، وەرجە کوشتنی لە پەلاماریگ وە فڕۆکەوان بیفڕۆکەوان لە یەمەن لە ساڵ 2011.

حەسەن ماوەی دادگاییکردنەگە وت کە تەقەکردنەگە وە ئامانج ریگریکردن لە سەربازەیل بۊە لە چگن ئەرا ئەفغانستان و کوشتن مسوڵمانەیل.

و بڕیار ترەمپ لە وەختیگ تیەێد کە مشتومڕ لەناو وڵاتە یەکگرتگەیل دووارەو بوود لەباوەت ئامرازەیل جیوەجیکردن لەسێدارەداین، و وە تایبەت دۊای سەرنەکەفتن تەقەلای لەسێدارەداین کریستا پایک وە دەرزی کوشندە لە ویلایەت تێنیسی لە هەفتەی گوزەشتە، کە بۊە مدوو مەنینی لە ژیان و کلکردنی ئەرا خەسەخانە.

 ئیدارەی ترەمپ لە وەختیگ گوزەشتە لە ساڵەگە لەسێدارەداین وە گولە زیای کردۊ، لەشان کارەبا و تاسانن وە غاز، ئەرا ئامرازەیل جیوەجیکردن سزای لەسێدارەداین ریوەپیدریاگ لە دۆسیە فیدراڵییەیل.

 ری  وە وەکارهاوردن تیمەیل لەسێدارەداین وە گولە لە پەنج ویلایەت ئەمریکی دریەێد، لە وەختیگ سوپای ئەمریکی ئی شیوازە لە دەیان ساڵەو وەکار نەهاوردگە، و داتایەیل ناوەند زانیارییەیل سزای لەسێدارەداین نیشان کەن کە دۊایین لەسێدارەداین سەربازی ئەمریکی لە ساڵ 1961 وە هەڵواسین جیوەجی کریا، لە وەختیگ دۊایین وەکارهاوردن ناسریاگ ئەرا تیمیگ لەسێدارەداین سەربازی ئەمریکی گلەو خوەێد ئەرا ساڵ 1945.

 ئەگەر فەرمانەگە لە وەرانوەر حەسەن جیوەجی بکریەێد، ئەوە بوودە یەکەم لەسێدارەداین سەربازی ئەمریکی لە ساڵ 1961ەو، و هەمیش بوودە یەکیگ لە دیارترین وەکارهاوردنە نووەیل ئەرا تیمیگ لەسێدارەداین لە وڵاتە یەکگرتگەیلڕ و هێمان وەخت جیوەجیکردن و شوینەگەی دیاری نەکریاس، وە چەوەڕیکردن بڕیار وەزیر سوپا.