شەفەق نیوز- واشنتۆن

دۆناڵد ترەمپ، سەرۆک ئەمریکا، ئمڕوو شەممە، مەزەنەی ئەوە کرد کە ئیران لەپشت ئەو پەلامارەس کە کڕ لۊلەیل "خوەرەڵات خوەرئاوا" لە سعودیە کردە ئامانج، نشانەیگ ئەرا ئەو پەلامارە کە ریاز راگەیان کڕەگە رۊوەڕۊی بۊەسەو وە فڕۆکەیل بی فڕۆکەوان کە لە عراقەو هاتنە.

 ترەمپ، وەپای میدیایەیل راگەیانن ئەمریکی، باس شازادەی جینشین سعودیە کرد وە ئەوە کە "دووسیگ خاسە" ئەرای، دووپات کرد کە "گشت کارەیل وە خاسی چن".

 لەباوەت گرووپ حووسییەیل، ترەمپ وت کە "حووسییەیل نیەخوازن بچنە جەنگیگ دژ وەپیمان".

 وتیش کە "ئیران هیچ وەخت خاوەن چەکیگ ئەتۆمی نییەوود"، دیاری کرد کە جەنگ وەگەردی "فرە زۊ" کووتایی وەپی تیەێد.

 لەباوەت گەروو هورمز، سەرۆک ئەمریکی دووپات کرد کە وڵاتەگەی "کۆنتڕۆڵیگ تەواو دیرێد" لەبان گەرووەگە، کە یەکیگ لە گرنگترین رێڕەوەیل دەریایی ئەرا جۊلەی نەفت و وزەی جەهانیە.

 سعودیە دۊکە جمعە، راگەیان کە کڕ لۊلەیل "خوەرەڵات خوەرئاوا" لە هەردوگ ناوچەی ریاز و مەدینەی مونەوەرە کریانەسە ئامانج وە چەن "فڕۆکەیگ بی فڕۆکەوان کە لە عراقەو هاتنە"، وتیش کە "هەڵوژارد وەڵام نەێدەو لەی قۆناغە، و پشتگیری تەقەلایەیل حکومەت عراقی بکەێد".

 لە بەغداد، سەرۆک وەزیرەیل عەلی زەیدی داوای لێکۆڵینەوە وەگەرد فەرماندەیی ئۆپەراسیۆنەیل میسان کرد، دۊای چەسپیان دەرچگن ئەو دەسدریژییەیلە کە سعودیە کردنە ئامانج لە پارێزگاگەو، هەمیش بڕیار لەکارلاوردن فەرماندەی ئۆپەراسیۆنەیل میسان دا، و بەسانن دوو مەرز سنووری.

لەلای خوەیەو، گرووپە چەکدارەیل لە عراق، لە وەختیگ گوزەشتە لە ئمڕوو شەممە، تیکەڵبۊنیان لە کردنە ئامانج دامەزراوەیل وزەی سعودی رەت کردن، و لە وەختیگ دووپات کردن کە ئەوە "شەرەفیگە بانگەشەی نییەکەن"، ئامادەیی خوەیان نیشان دان ئەرا بەشداریکردن لە هەر دەسەیگ لێکۆڵینەوەی حکومەتی.