شەفەق نیوز/ ئاژانس "فرانس پرێس"، ئمڕوو پەنجشەممە، راگەیان دەسڵاتدارەیل بزوتنەوەی تالیبان لە ئەفغانستان سزای لە سێدارەدان ئەرا دوو پیاو جیوەجیکرد وە توومەت کوشتن.
یەکیگ لە رووژنامەنویسەیل ئاژانسەگە خەوەردا، "دوو پیاوەگە وە گولەواران لەناو بازیگای وەرزشییگ لە شار غەزەنە لە سێدارە دریانە و هەزاران پیاو کووەو بوینە ئەرا ئەنجامداین سزای لە سێدارەداین".
وەرپرس گەورەی لە دادگای باڵا عەتیق اللە دەرویش، وت "ئێ دوو کەسە وە تاوان کوشتن سزادریانە، لەدویای دادگایکردن لە ماوەی دوو ساڵ لەنوای دادگای وڵاتەگە، لەژیر فەرمان سەرکردەی باڵای تاڵبان هیبەتوڵا ئاخوندزادە".
خێزانەیل قوربانیەیلە لە بازیگاگە ئامادەبوین و رەدیکردن ئەو دوو پیاوە بوەخشن.