شەفەق نیوز - تاران
وەزارەت دەیشت ئیرانی، رووژ دووشەممە، ئیسرائیل وە بۊین لە پشت هەڵمەتیگ "چەواشەکاری راگەیانن رێکخریاگ" تاوانبار کرد، کە ئامانجی نیشاندان تارانە جۊر هەڕەشەیگ ئەرا حکومەتەیل خوەراوایی و ژیان هاووڵاتییەیل ئاسایی، و گاڵداین رای گشتی ئەمریکی و ئەوروپی ئەرا پاڵپشتییکردن ئاڵۆزی سەربازی لە دژی.
قسەکەر وەناو وەزارەت دەیشت ئیسماعیل بەقایی لە بڵاوکریاییگ لەبان پلاتفۆرم "ئێکس"، ئاشکرا کرد کە هەڵمەتەگە ئەوەگ وە "دۆسیەیل یەخچاڵەیل" لە فەرەنسا ناسریاگە لەخوەی گرێد، لە شان قسەیلیگ لەباوەت پلانداین ئیران ئەرا تیرۆرکردن وەرپرسەیل ئەمریکی، وە هەژمارکردن ئەوە کە ئامانج لەلی دروسکردنە رخە لەلای هاووڵاتییە خوەراواییەیل و شەرعییەتداینە وە بڕیارە سیاسی و سەربازییەیل حکومەتەیلیان وە دەسپیچگ پاراستن بیوەیی گشتی.
بەقایی دۊنێد، کە نیشاندان وەرپرسەیل ئەمریکی وە شیوەی ئامانجەیل ئەرا پرۆسەیل تیرۆرکردن چەوەڕیکریاگ هەمیش نیاز دیرێد ئەرا بردن ململانێیەگە وەرەو پرسیگ کەسی ئەرا ئەوان، وە تاوانبارکردن وڵاتەیل یەکگرتگ و ئیسرائیل وە پیادەکردن "تیرۆر دەوڵەت" لەڕی تیرۆرکردن وەرپرسەیل و ئامانجگردن مەدەنییەیل لە ماوەی جەنگ لە دژ ئیران.
دووپات کرد کە تاران وەردەوامە لە وەڵامداین لە چوارچیوەی "وەرگری رەوا لە خوەی"، و هەوەجەی وە پەنابردن ئەرا تونوتیژی تیرۆریستی یا پەکخستن ژیان رووژانەی هاووڵاتییەیل نییە.