شەفەق نيوز- تەهران 

وەرپرسیگ ئیرانی، ئمڕوو چوارشەممە، ئاشکرا کرد کە 87٪ لە بەنداوەیل ئاو سەرەکی کە ئاو ئەرا تەهران پایتەخت کلکەن چووڵەو بوینە، کە رخ لە بەدی رەوش ئاو لە شارەگە زیایەو کەێد، و هەڕەشەی رەسانن سەرەکیی دەێد لەسای زیایبوین لە داواکردن. 

   محمد سادق موعتمدیان پارێزگار تەهران ئەرا ئاژانس "تەسنيم" وت: وەکارهاوردن ئاو نووشین و تەندروسی لە پایتەخت ئیران، پەنج گلە چەنە ریژەی نیشتمانیە، وتیش: تەهران هەمیش قەرەباڵغی دانیشتگی وەخوەی دوینێد کە 21 گلە لە ریژەی گشتی بەرزترە.

 موعتمديان دیاری کرد کە 87% لەو چوار بەنداوە سەرەکیە کە ئاو نووشین وە تەهران دەن چووڵەو بوینە، لە وەختیگ تەنیا بەنداو تاڵقان کەمیگ خاستر کار کەێد.

 وتیش: 62% لە ئاو نووشین لە پایتەخت وە بیر و سەرچەوەیل ژیرزەوی دابین کریەێد، لەسای سەختیەیل وەردەوامیگ لەنوای کەرت ئاو لەوەر وەکارهاوردن زیای و زیایبوین زویوەزوی دانیشتگەیل.

وەرجەیە، کۆمپانیای ئاو و ئاوەڕۆی لە پارێزگای تەهران راگەیانن کە پایتەخت ئیران وە گەنترین رەوش ئاوی لە ماوەی سەد ساڵ تا ئیسە وەخوەی دوینێد، لە ئەنجام هشکەساڵی وەردەوام لەی پەنج ساڵ گوزەشتە، و داوەزیان بڕەیل واران لەی ساڵە، کە وە سەختی کاریگەری لەبان سەرچەوەیل ئاو داشت.

لە رووژ سێشەممەو 15ی تەممووزەو، راپۆرتەیل مەیدانی دەسکردن وە باسکردن لە بڕیان ئاو، وەتایبەت لە تەهران، و ئی رەوشە رووژەیل چوارشەممە و پەنجشەممەی گوزەشتە وەردەوام بوی.