شەفەق نیوز - چەودیاریکردن 

ریخریاگ تەندروسی جیهانی، ئمڕوو یەکشەممە، باریگ لەناکاو تەندروسی گشتی ناودەوڵەتی راگەیان وە هووکار بڵاوەوبوین ڤایرۆس ئیبۆلا لە کۆنگۆ و ئۆگەندا.

 تەندروسی جیهانی وت: کە "تێدرۆس ئەدهانۆم غیبرێسۆس وەڕێوەبەر گشتی بڕیار دا کە بیماری ئیبۆلا کە لە ڤایرۆس بۆندیبۆگیۆ لە کۆمار کۆنگۆی دیموکراتی و ئۆگەندا پەیا بویە باریگ لەناکاو تەندروستی گشتی دروس کەێد کە نیگەرانییگ ناودەوڵەتی دیرێد،  باوجی نێەڕەسیدە پەیمانەیل ئاست پەت".

 وتیش: ئامانج لەی راگەیاننە خستن وڵاتەیل هاوساس لە باریگ ئامادەباشی فرە و گردەوکردن پشتگیری لە کۆمەڵگای ناودەوڵەتی.

 وەپای ریخریایەگە تا رووژ شەممە "خەوەر دریاگە لە هەشت بیمار چەسپیاگ تاقیگەیی و 246 بیمار گومانلیکریاگ و 80 مردن گومانلیکریاگ لە کەرت ئیتۆری لە کۆمار کۆنگۆی دیموکراتی لە ری سێ ناوچەی تەندروسی لەلای کەمەو"، و کەرت ئیتۆری هاوسنوورە وەگەرد ئۆگەندا و باشوور سودان لە باکوور خوەرهەڵات کۆمار کۆنگۆی دیموکرات.

 وتیش: "بیجگە لەوەیش، خەوەر دریاگە لە دوو تویشهاتن چەسپیاگ تاقیگەیی کە یەکیگیان مردن لەخوەی گرێد وەبی بوین پەیوەندییگ ئاشکرا لەناوەینیان لە کامپالا لە ئۆگەندا، و یەیش لە ماوەی 24 سەعات لەناوەین هەردوگیان، لە رووژەیل 15 و 16ی مایۆ 2026، لەناوەین دوو کەس گەشتیار لە کۆمار کۆنگۆی دیموکراتەو".

 وەپای پەیمانگەی رۆبەرت کۆخ ئەڵمانی، ریژەی مردنەیل وە مدوو ئیبۆلا تۊنێد بڕەسێدە 90% ئەگەر چارەسەر کەسە تۊشبوییل وەپەلە نەکریا.

 ئیبۆلا وە بیمارییگ گوازراوە هەژمار کریەێد، و ڤایرۆسەگە لە ری وەرکەفتن لەش و وەرکەفتن وەگەرد شلە لەشیەیل تیەێد، لە وەختیگ زیاتر لە 11 هەزار کەس لە ماوەی بڵاوەوبوین بیماریەگە لە خوەراوای ئەفریقا لە ساڵەیل 2014 و 2015 مردنە.